Ania, Aya, ti Senior High School?
Manamnama a makatulong ti nayon a dua a tawen tapno maisagana dagiti agad-adal kadagiti kasapulanda a paglaingan.
KAS ituyang ti linteg, mairugin ti senior high school iti masungad a panagseserrek. Kayatna a sawen a mairugin ti maika11 nga agtungpal iti maika12 a tukad ti high school a kas intuyang ti linteg a nangpanday iti K to 12 a sistema ti edukasion.
Iti sabali a pannao, saanen a makuna a nagturpos iti high school ti nakalpas ti maika-10 a tukad ti pagadalan. Masapul nga aglasat pay iti nayon a dua a tawen iti kurikulum a maitutop iti pilina ken pagduyosanna a tay-ak ti panagadal.
Manamnama a makatulong ti nayon a dua a tawen tapno maisagana dagiti agad-adal kadagiti paglaingan tapno makapagtrabaho, makapagnegosio, makagun-od iti teknikal ken bokasional a kabaelan, ken kabaelan nga agkolehio wenno makagun-od iti nangatngato pay nga edukasion. Sakupen ti senior high school dagiti sumaganad a tay-ak ti panagadal: Akademiko (a mangsakup iti Business, Science & Engineering, Humanities & Social Science, ken General Academic area);
Technical-Vocational-Livelihood (ken dagiti highly specialized nga asignatura a maaddaan iti kualipikasion a kas kadagiti agturpos iti Technical Education and Skills Development Authority); Sports; Arts & Design. Ken saan nga agsardeng kadagitoy a tukad ti adalen ti nagturpos iti senior high school. Mabalin nga itultuloyna pay iti nangatngato a tukad kadagitoy a tay-ak kalpasan ti panagturposna.
Kuna ketdi dagiti nangbukel iti kurikulum ti senior high school a saan a maipasigurado iti nakalpas iti senior high school ti madadaan a panggedan ngem ketdi, makaited kenkuana iti gundaway a makasapul iti panggedan gapu iti imet dagiti nagturpos iti daytoy a tukad a kabaelan a mangipatungpal iti sumrekanda a trabaho.
Iti panangpili dagiti estudiante iti tay-ak nga adalenda iti senior high school, adda dagiti istandard nga eksaminasion ken panglakagan nga isayangkat dagiti pagadalan a pakairamanan ti aptitude test, career assessment exam, ken occupational interest inventory for high schools.
Malaksid kadagitoy, adda pay career advocacy activities a maaramid tapno matarabay dagiti estudiante a mangpili iti kayatda nga espesialisasion.
Ipasigurado pay dagiti nabukel nga istandard tapno kabaelan ti maysa a nagturpos iti senior high school dagiti rekititos ti panggedan a pinilida ket ipaayan pay ida ti turay kadagiti sertipikasion a kabaelanda ti agtrabaho iti tay-ak a pinilida.—O