Kamias Prunes

ADUT’ bunga ti piasyo? Naggasatkan. Ngamin, adu ti mabalinmo nga aramiden iti pias. Saan laeng a maaramat a pagalsem iti masida, wenno iti ilaok iti vegetable salad wenno iti pinakbet. Mabalin pay a maaramid daytoy a chutney, jam wenno prunes.

Wen, prunes. Ket isu ti aramidentayo ita. Pagyamanantayo ni Prof. Nelia Sarian ti Mariano Marcos State University iti panangibinglayna kadatayo iti resipena iti kamias prunes.

Kastoy ti Agaramid iti Kamias Prunes (Para iti 5 a Kilo a Pias)

1. Bugguan a nasayaat dagiti pias. Ikkaten ti agsumbangir nga ungtoda.

2. Tudoken iti tenedor dagitoy.

3. Ikabil iti dakkel a garrapon. Warakiwakan iti dua a kutsara nga asukar. Bay-an iti agpatnag. Aramiden daytoy iti mamindua a daras.

4. Ikkaten ti tubbog dagiti pias. Ikabil iti pariok. Nayonan iti maysa a tasa nga asukar.

5. Ipapudot. Bay-an a nakauper iti syrup iti agpatnag.

6. Adawen manipud iti syrup. Mangiluto iti 1 tasa nga asukar ken 2 kutsara a soy sauce. Bay-an iti agpatnag.

7. Ikkaten dagiti pias manipud iti syrup. Iwaras iti wire tray.

8. Ikabil iti plastic container. Sayaaten nga urnosen.

Palagip: Iti tunggal kilo (1,000 a gramo) a pias, kasapulanna ti 200 a gramo nga asukar (apagkalima no maidilig iti kadagsen ti pias).—O