Daldaligan a Naggapu Idiay Malaysia
ITI laksid ti kaadda ni uliteg ditoy Hawaii, kapid, saanna a mailaksid iti panunotna dagiti mapaspasamak dita pagiliantayo. Ket gapu ta nayanak ken dimmakkel a mannalon, dagiti laglagip a biag iti away ti is-istoriaenna kadagiti appokona sakbay a maturog dagitoy iti rabii.
Ti nakakaskasdaaw, kapid, magustuan met dagiti ubbing ti agdengngeg a kas met iti pananggustotayo kadagiti “sarsarita idi ugma” idi datayo ti ubbing.
Iti naminsan, nadanonko dagiti appokona a mangidepdeppel iti asin ti ginalipna a daldalligan wenno daligan (star fruit wenno Averrhoa carambola). Nasdaawak no naggapuan dagitoy; awan pay nakitak a kayo ti daldalligan ditoy Hawaii. Ngem idi kitaek ti naipigket iti saan pay a nagalip, nabasak a “Product of Malaysia.”
Kinuna ni uliteg a nangina dagita ngem ginatangna kano latta tapno maramanan dagiti ubbing ti sarsaramsamentayo idi— $4.99 ti maysa a libra wenno nasurok a $10.00 (P470) ti maysa a kilo!
Ngem awanen daydi kakaisuna a daldalligan idiay awaytayo. Mabalin nga awan payen iti ilitayo ta napukan idi panawen ti panagpupugon iti tabako. Maipagarup ngamin idi a ti laeng birhinia ti panguartaan.
No gayam namulaan idi dagiti dagdaga a nabaybay-an gapu ta awan irrigasion wenno pangawidan iti danum iti nadumaduma a mula wenno kayo a saan a makasapul nga agnanayon iti danum, adda koma met may-export iti sabali a pagilian.
Adda pay anonang ken sapote ( Diospyros nigra). Ditoy Amerika, aw-awaganda iti chocolate persimmon. Ngem ammom kadi, kapid, a nangina ti ice cream/sorbetes a nalaokan iti sapote? Manmano ngamin dagiti pagilian a pakasarakan iti daytoy. Ngem masarakan ketdi daytoy iti Florida, USA, Mexico, Australia ken Filipinas.
Ngem idiay Filipinas, nabayagen a diak nakakita iti sapote kalpasan a napuri daydi adda iti laud ti balay ni Baket Mutiang. Idi