Ammom ti Umno a Panagsibug Kadagiti Mula?
MANGLAYLAY dagiti mula a makasapul unay iti danum ngem saan koma nga urayen pay nga agtungpal iti kastoy a kasasaad dagiti mula aglalo dagiti maiserrek iti balay.
Malasin ti kinakurang ti danum kadagiti mula iti uneg ken uray pay iti ruar ti pagtaengan no naginad ti panagdakkel ken ilalangto dagiti bulongda, nasapa a panagtinnag dagiti sabong, kumriit dagiti igid dagiti bulong wenno lumusiawda.
Maurnong met ti kanayon a saggabassit a panangsibug kadagiti mula ta abugenna ti angin a mangpariir kadagiti ramut nga agresulta iti pannakalungsot dagiti ramut gapu iti panagadu dagiti fungi ken bakteria.
Adu met ketdi dagiti mula a maragragsakan iti nabasa a daga a kas kadagiti cypress ken lugo (talisay). Ngem kaaduanna kadagiti tropikal a mula a kas iti kayanga ti saan nga agbiag iti namaga unay a daga.
Madlaw lattan nga saan nga agbiag ti mula iti nabayag iti nabasa a daga no aglungsot gapu iti kaadu ti maisibug a danum.
Mapaliiw a nalabes ti maisibug a danum no aggiddan nga agtinnag dagiti baro ken daan a bulong, agangot pay ketdin dagiti ramutda a malungsot wenno adda makita a danum iti nakaimulaanda a masetera. Agbuot pay ketdi dagiti sabong no nalabes ti pannakasibug dagiti mula. Sibugan laeng dagiti mula no nasken isu a paliiwen ti kasapulan ti tunggal mula a kaadu ti maisibug.
Kasapulan ketdi dagiti mula ti adu bassit a danum kabayatan ti panagdakkelda ken panagadu ti bulong wenno sabongda.
Adu met ti kasapulan ti mula a danum no naingpis dagiti bulongda ken magango ti murdong dagitoy a bulong no agkurang ti maisibug kadakuada.
Ad-adu pay ti kasapulan ti mula a danum no adda iti napudot a siled wenno maininitan, bassit ti daga ti masetera a nakaimulaanna, dadakkel ti bulongna ken nabiit pay a nagramut.
Kabassiten met ti isibug kadagiti kaktus ken napuskol ti bulongda a masetas agraman dagiti kasla adda dutdot ti bulongda.
Kasta met a bassit laeng ti kasapulan dagiti agbagas ti ramutda a masetas. Kasapulan laeng nga agtalinaed a nadam-eg, saan a nabasa, ti puon dagitoy a mula. Masapul pay a panaraten ti pakaimulaan dagiti kakastoy a masetas tapno saan a nalaka a malungsot.
Bassit met laeng ti kasapulan dagiti mula a danum kalpasan ti panagsabong wenno panagbungada, addada iti nalamiis a lugar, kayak-akar iti nakaimulaanda ken naimulada iti plastik wenno metal a masetera.—O