Apay, Julia?

INAKO da James Reid ken Nadine Lustre, nga ad-adda nga am-ammo kas JaDine, nga agayan-ayatdan.

Berigud.

* * * Kasta met a nag-propose metten iti kasar ni Arthur Solinap ken ni Rochelle Pangilinan.

Mano a tawen met a nagayan-ayat dagitoy. Nasayaat la unay ta manamnama nga agtungpal iti kallaysa ti ayan-ayatda.

* * * Adda agsalsaludsod no apay kano a nabuntog ti taray ti career ni Julia Barretto. No ar-arigen, star material isuna.

No idilig ken ni Liza Soberano a nakagiddanna, ay, ket minilmilia ti nakaitarayannan.

Adda man mangibagbaga, ‘bagis, a nakarma isuna.

Dina ngamin kayat nga usaren ti Balivia nga apeliedo ni Dennis Padilla nga amana.

Awan met koma ti makaigapu ta Julia Barretto met ti screen name-na.

Uray ni Dennis ket Padilla met ti inusarna a kas aktor.

Ala, barbareng no agrimatto met laeng ti bituen ni Julia. Narigat met no di pay naglatak, nagsueken. Aysiay!

* * * Iti pannakasursurat daytoy, madama ti pannakarambak ti maika-30 a tawen ti EDSA 1.

Kuna ni Sen. Juan Ponce Enrile, ‘bagis, saan kano a nagballigi ti Edsa.

Sungbat met dagitay sutil, saan kano ngamin a nakapag-Presidente ni Enrile idinto nga agkuykuyyakoyen ni Fidel V. Ramos.

* * * PAGPALPALPAAN: Kablaaw kada kakabagis nga Atty. Levi Baligod ken Atty. Larry Gadon.—O

(Pasado a Presidente ti FAMAS, mabuya ni Kabagis Eloy a kas host ti “Tsismax” iti Global News Network Cable Channel tunggal Biernes, alas sais iti sardam, ken adda replay-na kada Sabado iti alas nuebe iti agsapa ken kada Huebes iti alas dose iti aldaw. Mabuya pay daytoy iti gnntv-asia.com.—AST)