Kastoy, Kapid, Ditoy Hawaii
Kadawyan a saan nga agpatingga ti pit bull agingga iti matay ti asino man a darupenna, ayup man wenno tao.
ITAY napalabas a bulan, agarup makalawas a linaon dagiti pagiwarnak ti pannakapaltog ti maysa a pit bull (puli ti aso) iti Honolulu International Airport.
“Pinaltoganna nga awan gapgapuna ni Kai’ele, ti mannakigayyem nga asok,” kinuna ni Leisa Ramos iti darumna kadagiti imbestigador iti airport.
“Binallaagak a maiparit ti kaadda ti aso iti dayta a lugar, nakapupok man wenno nakagalut,” impalawag ti agbambantay iti airport a nangpaltog iti aso. “Namin-adun nga imbilinko nga ipanawda ti aso ta tataulanna dagiti agsangpet a tattao iti Honolulu. Ngem saandak nga impangag. Idi naibbatan ti babai ti tali ti aso ket darupennak, naglingedak iti puon ti niog ngem napadataak iti panagsanudko isu a pinaltogak ti aso nga umasasideg kaniak.” Agpapan ita, awan pay nagbanagan ti kaso. Babaen ti panagkuna ni Ramos, inaywananna ti aso manipud nayanak daytoy. “Baby pay laeng. Isu ti kaay-ayam ti limaa-bulan a tagibik. Mannakigayyem ken nasursuruan a saan a mangdangran iti uray asino man.” Iti Big Island ti naggapuan ni Ramos ken ti asona.
Itay napalabas a lawas, Mayo 9, idiay Las Vegas, maysa nga innem-a-bulan a tagibi a babai ti kinagatkagat ken pinatay ti siam-ti-tawenna nga asoda a pit bull. Babaen ti panagkuna ti ina ti ubing, napan daytoy iti banio. Ngem idi agsubli iti salas, nakitana nga iwiswisiwisen ti aso ti ubing a kaarigna ti maysa a munmunieka. Inanawa ti ina ti maladaga ti aso nga agnagan iti Mana ngem idi ibbatanna ti ubing, agsalsalungayngayen daytoy.
“Tarakenmi ni Mana manipud idi uken,” kinuna ti ina. “Awan kinagatna a tao bayat ti siam a tawen a kaaddana. Diak ammo no apay nga inaramidna daytoy.”
“Kas iti tao, mabalin a rumasuk iti darana iti ania man a kanito.