Kudeta (5) Norberto D. Bumanglag, Jr.
Pagammuan la ta nakangngeg ni John iti maep-ep-ep nga ikkis. Lenglengngesenen ti lalaki ni Mrs. Guerrero.
Ti Napalabas: Parikut ni John Villa ti kellaat a panagpukaw ni Melanie Davis. Indiaya ni Deputy Bosworth ti tulong ti CIA ngem nagkitakit. Inkarina pay nga agsubli a dagus iti Amerika apaman a masapulanna ni Melanie. Ngem kuna ti Deputy nga agyan pay laeng iti Filipinas ta siimenna no pudno ti nasagapda a damag a rantada a padisien ti presidente ti Filipinas. Kadagita met laeng nga oras, pinatayda ti diputada a kangrunaan a kritiko ti presidente ket madanagan da Pat Coloma ken Gen. Manzano ta ti presidente ti tuduen ti liberal media nga akin-utek. Iti Amerika, inkeddeng ti Sekretario ti DOD, Sekretario ti Estado ken ti Direktor ti CIA a suportaranda ti pannakaikkat ti presidente ti Filipinas. Impakaammoda dayta ken ni Gen. Miguel a pudno nga utek ti pannakapapatay ti diputada. Gapu met ta agun-unton ni John, binilin ni Rommel ni Jasper a patayenna ti drayber a kunana a nangitulod ken ni Melanie idi nagpukaw. Innala met ni John ti adres daytoy. Napanna kinita ngem apagisu met a pinatayda. Sinukatan metten ti CIA ti Ambassador ti Amerika iti Filipinas. Agduadua ni Pat Coloma iti daytoy ket pinatigmaananna ti Presidente iti mabalin a panangtippuogda kenkuana.
(Maika-5 a Paset)
NAGKATAWA ti Presidente. Kinitana ti gayyemna. Ngem saan man laeng a nagkatawa wenno immisem laeng koma. Tinaliaw ketdi daytoy dagiti kameng ti PSG, dagiti nurse ken doktor a nairana nga adda iti pasilio.
Nagsardeng ti Presidente iti tengnga ti pasilio. “I’m serious,” kinuna ti Chief of Staff. Sinango ti Presidente ti gayyemna. “Sorry,” nayesngawna. “Salsalaknibanka laeng...” “Ammok. Ngem kitaem ti mapaspasamak iti Amerika. They invaded Afghanistan ti 9/11 attack tapno ungawenda ti al-Queda. Ita, agsangapulo ket pito a tawenen ti napalabas. Naparmekda kadi ida? Napadisida dagiti Taliban a nangituray ken nangited iti proteksion iti al-Queda iti Afghanistan ngem addada pay laeng a makilablaban kadakuada. Nabilegda pay laeng isu a nariribuk latta ti Afghanistan.” Saan a naguni ni Pat Coloma. “Ti Iraq? Natay ni Saddam Hussein. Timmaud ti ISIS ket awan latta talna sadiay. Kalpasanna, binutbutengda ti Syria. Pinangtaanda ni Hazzad ngem saan a dimngeg. Inaramidna ti ammona a nasayaat. Ania ti inaramid ni Obama? Awan...”
“Ngem ti Amerika pay laeng ti kabibilegan a nasion iti sangalubongan,” kinuna ni Pat Coloma.
“Nauman dagiti makipagili iti Amerika. Saandan a mairusok ti pannakibibiang ti gobiernoda kadagiti sabsabali a pagilian, aglalo iti CIA...”
“Ngem kabaelandaka pay laeng a padisien, sir.”
“Stop worrying about the CIA, Pat... Managbuyaka ngamin iti action a pelikula. Saanda a maaramid ti pampanunotem, patiennak.”
“Ngem ania ti kayat a sawen ti kellaat a panangsukatda iti ambassador? Maysa pay met ngarud a CIA ti isukatda...” Nagpanunot ni Pat Coloma. “Ken, wen gayam, inton bigat, mapasamak ti kadakkelan a rali manipud iti panagtugawmo a presidente.”
“A, awan ti maaramid dagiti tao,” insakuntip ti Presidente. “Ikarigatam a dalusan ti pagilian iti krimen, panagkunniber ken panagraira ti droga ngem saanda a mapnek. Dagiti dadduma, nailasagdan ti agtakaw ken manggundaway kadagiti umili.”
“Dakkel a rali daytoy... mairaman dagiti mangmangged ken aktibista nga
agtutubo. Ket no aduda, amangan no makiramanto payen dagiti NPA ken terorista, ken no asino pay ditan gapu kadagiti adu a pammapatay nangruna iti kunada nga extra judicial killings... ken kangrunaanna ti amin, ti pannakapapatay ni Diputada Rosqueta. Sika latta ti atapenda iti pannakapapatayna. Masapul a malapdantayo ida.”
Nagwingiwing ti Presidente. “Bay-am ida. Palubosam nga ag-ralida. Kalinteganda dayta. Agingga nga adda kaniak ti panagtalek ti PNP ken ti Armada ti Filipinas, awan ti maaramidda.” “Nalabes unay ti panagtalekmo!” “Gapu ta agtalekak kadagiti umili. Isuda ti nangibutos kaniak. They wanted change... and I’m going to give them that change and hope. Awan ti makaatipa kaniak. Not even the United States of America nor the CIA.”
Nasiputan la unay ni Pat Coloma ti panagkuti ti pispis ti Presidente.
APAGTANGEP ti sipnget ngem kasla nakaad-adalemen ti rabii. Tantannawagan ni John ti kataltalonan iti likud ti balayda. Kalkalpas ti gapas. Maangotna pay laeng dagiti maganggango a garami. Nakaul-ulimek iti daytoy a paset a napili ni mamangna a nangipatakderanda iti balayda. Isuda ti kaigidan iti kataltalonan.
Daytoy ti kasapulanna a lugar. Awan ti makatagari a kaarrubada. Awan ti makitana no di ti nalawa a kataltalonan ken ti bantay a nakaberberde iti saan unay nga adayo iti daya.
Ania koman a ragsakna no adda ni Melanie iti abayna: nakaarakup kenkuana ken sagpaminsan nga aglantip dagiti bibigda. Napakidem a nangmesmes. Saanna nga ammo no ania ti napasamak ni Melanie. Agkarkarawa. Ket nasakit ti nakemna ta kabaelanna a pasardengen dagiti terorista nga agpapatay wenno agdadael ngem kas man la awan maar-aramidanna iti panagpukaw ni Melanie.
“Dad,” nasinga iti panangpaguni ni Jay-ar kenkuana. Malasinna ti timek ti barona. “Mangantayo kanon, kuna ni grandma.” Immabay ni Jay-ar kenkuana ket nagsammaked iti beranda.
“Ania ti linuto ni grandmam?” sinaludsodna. Tinaliawna ni Jay-ar.
“Ikan, tinuno a paltat, liningta a tilapia... sa marungay,” insungbat ni Jay-ar. “Inta ngaruden,” kinuna ni John ket sinallabayna ni Jay-ar. “Kinasaritamon ni Angkel Rommel, dad?” pagammuan ta sinaludsod ni Jay-ar ket napasardeng ni John. “Maipapan iti ania?” “Ni Anti Melanie. Ammo siguro ni angkel ti yanna.” Tinangad ti ubing ti amana.
“Wen, kinasaritakon...” Ngem kasla adda nagsullat iti karabukobna ta ul-ulbodenna ti anakna. “Ania ti kunana?” “Dina kano ammo ti yan ni Melanie.” “Agsuitsuitik daydiay, dad.” “Ania ti pagkunaam?” “Marikriknak la’ng.” Kinuso ni John ti buok ti barona. “Ubingka pay, ammomon daytan?” “Walo ti tawenkon, dad!” “Wen, ammok. Ngem ubingka pay.” Nagna ni John. “Intan, mabaawanen ti pangrabiita.” “Dad, agkuskusit ni Angkel Rommel. Adda ilemlemmengna.” Iniggaman ni John ti agsumbangir nga abaga ni Jay-ar. Miningminganna ti ubing ngem kasla nakitana ti rupa ni Veronica ket kasla adda punial a naitudok iti barukongna ta sumeksek manen iti panunotna ti lunod kenkuana. Natay kadi metten ni Melanie? “Dad...” Natawan ni John. “Denggennak, barok. Pangngaasim ta dimo ibagbaga ken ni angkelmo nga agul-ulbod, wen? Masapulakto ni antim a Melanie, maawatam?” Kimmita laeng ni Jay-ar kenkuana. “Promise me, son...” Immanges iti nauneg ni Jay-ar. “Okay, dad... promise.” “Good. Inta ngarud manganen. Madukotan itan ni grandman a mangur-uray kadata.”
Ngem sakbay a nakagtengda iti komedor, sinaludsod ni Jay-ar: “Can we go practice shooting, dad?”
Nagkuretret ti muging ni John. Masmasdaaw. Ngem saanen a nakasungbat ta nagkiriring ti selponna. Inruarna. Dina malasin ti numero a nagparang. “Hello,” insungbatna. Sangit ti nangngegna. Kellaat nga adda nagkarayam a danag iti barukongna. “Hello,” kinunana manen. “Asino daytoy?” Sangit latta ti nangngegna ngem addan pamalpalatpatanna. “Mrs. Guerrero?” kinunana. “W-wen, siak ti asawa ti pinatayda...” mabutbuteng a timek ti babai. Ti asawa ti pinatayda a drayber ni Rommel idiay karayan. “Pinatayda ti gayyem ni lakay a nakasaksi iti panangpapatayda kenkuana...”
“Shit,” nayesngaw ni John ket minulagatan ni Jay-ar. “Kaano pay?”
“Dua nga oras pay laeng ti napalabas. Diak koma yawag ngem adda dagiti ganggannaet a rupa nga immay nakimassayag. Sangkasiputdak. Mabutengak. Awagak koma dagiti polis ngem kunam met a saanko ida nga awagan...” “Addada pay laeng?” “Addada.” “Okey... kastoy, dimo ipadlaw a mabutengka wenno ammom ti kaaddada. Ngem siguraduem a saanka nga agmaymaysa. Umayak dita. Dimonto ipadpadlaw ti kaaddak.” Impis-itna ti end call. “Adda papanak,” kinunana ken ni Jay-ar. “Ngem ti pannangantayo, dad...” “Manganakton no makaawidak. Ibagam lattan ken ni grandmam nga adda napanak.” “’ Tay ngarud target shooting-ta, dad?” “Mapantanto no bigat,” insungbat ni John ket nagdardarasen a rimmuar. Nagturong iti garahe. Siniggawatna ti helmet a nakasab-it iti diding. Simmakay iti Kawasaki ZX10R sa inyusongna ti helmet. Madamdama pay, inabungotanen ti tapok nga inkuyog ti motor ti higante a banga iti trianggulo iti amianan ti munisipio.
MANIPUD iti pangadaywen a kursada a pakakitkitaanda ti derehas a dakkel a balay, nakaul-ullimek da Daniel ken Jerky a mangsipsiput iti panaglukat ti ruangan. Nakatugaw iti sango ti manibela ni Jerky idinto nga adda iti passenger seat ni Daniel. Nakasaklot iti AR-15 ken dua a 9mm. Sabali laeng ti iggem ni Jerky a dua met a .45. Sangkataldiapda ti oras. Alas sieten iti rabii. Ammoda nga iti ania man a kanito, aglukat ti ruangan ta adda pasken nga atendaran ti senador nga agyan dita. “Bumubukas ang gate,” kinuna ni Jerky. Timmaliaw ni Daniel. Napardas ti panaglukat ti ridaw. Rimmuar ti maysa nga SUV, a sinaruno ti maysa pay. Pinagandar ni Jerky ti luganda. Inurayda a makalabas dagiti dua a lugan. Sumrek koman iti kalsada ni Jerky ngem nasaripatpatan ni Daniel ti sabali pay nga SUV a rumrummuar iti ruangan.
“Agurayka,” inyatipa ni Daniel. “Adda pay maysa a rumrummuar nga SUV.” Rasaw ti nayesngaw ni Jerky. “Yan ti senador?” Nakasuron ni Daniel. “Agbalin a komplikado ti misionta...” Inipus ni Jerky ti maikatlo nga SUV. Naannadda. Inrantada nga adda maysa a lugan iti sangoda tapno saan a nakaddidillaw ti isusurotda. “Kasano ti kabayagda iti destinasionda?” sinaludsod ni Jerky. “Trenta wenno kuarenta a minuto... depende iti trapiko. Ngem dakkel ti problemata. Sadino kadagiti tallo nga SUV ti nagluganan ti senador?” Nagrasaw manen ni Daniel sa iniggamanna ti AR15. Kinitana ti magasin no adda met laeng balana sa met laeng insublina. Kayatna a leppasenen a dagus daytoy a misionda. Ngem sangapulon a minuto sumursurotda, dida met laengen makatiempo.
Rumasayen ti trapiko. Madamdama laeng, awanton ti lugan a nagbaetanda iti naudi nga SUV. Sumrekdan iti naiputputong a kalsada ken is-isudan ti adda iti kalsada: ti tallo nga SUV ken ti luganda a nakadadaan a Toyota. Ken duapulo a minuto laengen, makagtengdan iti destinasionda. Nasken nga aggunaydan. “Abayem!” kinuna ni Daniel ken ni Jerky. Impayat ni Jerky ti siliniador. Nagungor ti luganda ngem nakiabay iti SUV. Inruar ni Daniel ti 9mm-na. Sinirigna ti ligay iti sango. Pinagsasarunona a pinaltogan. Bimtak. Nagiwes ti SUV ket agpakanigiden daytoy a mangdungpir kadakuada tapno matinnagda iti kalsada. Naginayad ti luganda. Nagtartarus daytoy. Binuyada a natinnag iti abaga ti kalsada. Nagbaliktad iti namitlo a daras. Madamdama pay, nakapaspaspasdan a nangkamat iti maikadua nga SUV.
No nakalugan ti senador iti nabaliktad a lugan, siguradoda nga agsardeng dagiti dua nga SUV. Ngem ad-adda ketdi a pimmardasda a pimmanaw.
Kinamatda dagiti SUV. Agingga iti nakaasidegda. Pinadas ni Jerky nga abayen ti maikadua ngem apagabayda, naibaba ti sarming daytoy ket paltog ti nangkomusta kadakuada.
“Agpainayadka!” inriaw ni Daniel ngem nagallangoganen ti putok. Napuntaan ti luganda. Napasarunuan pay iti nagsaruno a putok. Nabuong ti windshield. Nagtanabutob ni Jerky.
Immipusda iti SUV. Pinaltogan ni Daniel ti likud daytoy agingga a naibus ti linaon ti magasin. Ngem saanda a mapasardeng ti SUV. Madanaganen ni Daniel. Umab-ababa ti gundawayda. Agingga a napanunotna nga ikugtar ti nabuong a windshield agingga iti naltat daytoy iti nakaikapetanna. Inkarigatanna nga induron nga intinnag. Ginammatanna ti AR-15. Pinapegges met ni Jerky ti panagmanehona. Idi makaasidegda bassit, inibus manen ni Daniel ti nagyan ti maikadua a magasin. Natatek ti likud iti bala. Nagiwes ti lugan, nagbalibaliktad sa nagsardeng iti tengnga ti kalsada.
Nakapigpigsa ti panagpreno ni Jerky. Nagsardeng a mismo iti sango ti nabaliktad a lugan. Ginammatan ni Daniel ti sabali a 9mm sa innalana ti flashlight. Nakaparpardas a nagturong iti SUV. Impaturongna ti flashlight iti lugan. Agas-asuk payen daytoy. Nakapigpigsa ti panagtedted ti gasolina iti tangke.
Nagkul-ob ni Daniel a nangipaturong iti flashlight iti uneg ti lugan. Agkutkuti ti maysa a nakaiggem pay laeng iti paltog ngem nadigos iti bukodna a dara. Agkiremkirem. Minatmatan daytoy ni Daniel. Naparasaw.
Pinaltogan ni Daniel ti ulo daytoy. Saan a mabalin a mangibatida iti sibibiag a saksi.
Iti saan unay nga adayo, nakapaspaspas ti immuna nga SUV nga agsublin kadakuada. Sinaggaysa ni Daniel a kinita dagiti pasahero. Agingga a nakitana ti senador. Agkutkuti pay laeng. Kinitana ti adu a gasolina iti kalsada sa imbaw-ingna dagiti matana iti makasisirapen a silaw ti umas-asideg nga SUV. Sinirigna ti headlight ti lugan. Namindua a nagputok. Naiddep dagiti silaw. Ngem napardas latta ti yaasideg ti SUV.
Nagsanud ni Daniel sa idi makaadayo bassit, inturongna ti flashlight iti agtedtedted a gasolina. Pinaltoganna daytoy. Ket kabayatan ti nakaparpardas a panagtarayna nga umadayo, simbuag ti nakapigpigsa a kanalbuong. Simrek a dagus iti luganda. Inrikepna ti ridaw daytoy ket nakapaspaspasen ni Jerky a nangpataray.
Napaangesda iti nalukay. Ngem saanda pay a nakaadayo, masabatdan ti lugan dagiti pannakabagi ti linteg.
Nagkinnita dagiti dua. Insagana ni Daniel ti AR-15. Inuksotna ti magasin sa sinukatanna iti sipupunno iti bala. “Agpainayadka,” kinunana ken ni Jerky.
Napainayad ni Jerky. Linabsan ida dagiti tallo a lugan dagiti polis.
Nabang-aranda. Binaddekan ni Jerky ti siliniador. Linukayan met ni Daniel ti panangiggemna iti AR-15. “Problema...” pagammuan ta kuna ni Jerky. Nagmuregreg ni Daniel. “Ania a problema?”
“Kamkamatendata dagiti polis!”
PANGADAYWEN ti nangiparkingan ni John iti motorna. Imbatina pay ti helmetna. Kinitana ti sango ti pagtaengan a papananna. Naraniag. Nakaas-asuk ti atong iti sango idinto nga iti nabalawbawan a sango ti balay, nakaad-adu dagiti tao nga agaaribungbong iti dua a lamisaan. Mabalin nga agsusugalda iti Lucky 9.
Nagturong iti likud. Simmirip iti tawa ti kosina. Nakitana ni Mrs. Guerrero a makisarsarita iti sumagmamano a babbaket ken babbalasang. Inruarna ti selponna. Indayalna ti numero ti babai. Inruar ni Mrs. Guerrero ti selponna. “Ni John daytoy, Mrs. Guerrero. Dika agpadpadlaw. Agtignayka a kasla gagangay laeng nga inawagannaka ti maysa nga amammom. Diak kayat nga agatap ti lalaki a kunkunam.” “Wen... Yanmo?” “Sumirsiripak iti tawa ti kosinayo. Buybuyaenka.” “Umayak dita?” “Saan. Agtalinaedka laeng iti yanmo, ngem annadam a mangngegnaka dagiti kaduam. “Naawatannak?” “Wen...” “Adda pay laeng ti lalaki a kunam?” “Adda.” “Agmaymaysa wenno adda kaduana?” “Diak masigurado.” “Talkennak kadi, Mrs. Guerrero?” Saan a nakauni ni Mrs. Guerrero. “Kayatka a tulongan, ngem kasapulak ti tulongmo.” “Ania ti aramidek?” “Rummuarka. Inka iti tianggi iti sumaruno a kalsada... Agpammarangka nga adda gatangem...” Nakitana itay ti tianggi. “Mabutengak. No ngaruden no...” “Addaak laeng iti likudam. Diak ipalubos nga adda dakes a mapasamak kenka. Ngem saanka a piliten. Ngem no diak mapasardeng dagitoy nga agpanggep iti biagmo, agnanayonto nga agbubutengka ta saandakanto a sardayan.” “Ngem apay?” “Adu ti ammo ni lakaymo a nasken a masalakniban ket siniguradoda a saanna a maibutaktak. Nairamramanka ta atapenda nga adda naibaga ni lakaymo kenka.”
“Adda dua nga annakko a mangnamnama kaniak...” Nadlaw ni John ti buteng iti timek ti babai. “Aramidek ti kayatmo...” “Good. ““Nanang, adda laeng mapanko gatangen,” nangngegna nga impakada ni Mrs. Guerrero kadagiti kasangsangona ket nakitana a timmakder daytoy ken rimmuar.
Imbilin ni John a saan a putolen ni Mrs. Guererro ti awag tapno maibilinna dagiti aramiden daytoy. Sa nagdardarasen a nagturong iti sango ti balay. Nakitana ni Mrs. Guerrero a nanglasat iti ummong dagiti tattao a naariwawa nga agaayam iti baraha. Idi makagteng iti ruangan, timmakder ti maysa a lalaki. Adda kinissiimanna a sabali a lalaki ket timmakder met daytoy.
“Basta saanka a tumaliaw, “kinuna ni John iti babai. “Addaak iti likudmo, dika madanagan.”
Idi addadan iti awan matatao, umas-asidegen ti maysa kadagiti lallaki ken ni Mrs. Guerrero. Naud-udi ti maikadua. Imbolsa ni John ti selponna. Sangapulo nga agpa ngata ti kaadayo ti maikadua a lalaki iti immuna. Pinardasan ni John ti immasideg iti naud-udi. Inrakusna ti takiagna iti tengnged daytoy. Naggulagol ngem nairut ti pananget-et ni John iti tengnged daytoy. Nagarengeng, nagkudagkudag, in-inut a kimmapuy agingga a saanen nga agkutkuti. Inulodna daytoy sa intinnagna iti kanal iti igid ti kalsada.
Pagammuan la ta nakangngeg ni John iti maep-ep-ep nga ikkis. Lenglengngesenen ti lalaki ni Mrs. Guerrero ken impaturong daytoy ti paltogna iti ulo ti babai.
(Maituloyto)