Napimpintaska nga Ayaten iti Kinaadayok Arnold C. Baxa
Iti tallo a dekada ken walo a buko ti kawayan, A nangiruknoyak iti ayatko, mabalimo a sukaten, Mabalinmo a pugtuan no kasano nga inayatka Iti saniit ti init, iti sabrak ti bayakabak Iti unos ti panagmaymaysata...
Ngem adda karit a kayatko a sanguen: Tarigagayak nga umunaak Nga agbaniaga ngem sika, a sisiak, agmaymaysa a mangbirok Iti pagtalimudokan ti diak idi pinili a dalan...
Nagbiagak iti biag iti kinaykayatko a panagbiag; nagayatak iti ayat Iti kinaykayatko a panagayat. Babawi? Sangarakem! Ngem, Awan pay ti naam-ammok nga awanan...
Adda dagiti banag a kayatko a makita; a kayatko a marikna.
Kiddawek ngarud a saanmo nga ibalud ti bagim kaniak; Diak makapanaw iti pannakalmes dagiti matam, iti saem ti saning-im...
Agbiagka iti pammatim A sika ti orkidia, a sika ti rosas ti biagko. A sika ti linnaaw ti kalgawko, Ti bullalayaw ti nepnepko: A sika ti angin nga angsek, ti danum nga inumek...
Iti kaawanko, suknalamto dagiti disso iti pakasaritaanta, lagipemto dagiti pasamak a nailaga, dagiti nailimog a sam-it ken pait, dagiti pauyo ken ay-ayo, dagiti liday ken katkatawa iti tallo a dekada ken walo a buko ti kawayan iti biagta...
Uray adayoakto, asidegakto latta, Ta nupay saannakto a mangngeg, saannakto a makita, Mangngeg ken makitakanto latta.
Ket no denggemto ‘ta pusom, ken no riknaemto ti apiras ti pul-oy, Mangngegnakto ken mariknanakto. Ta addaakto latta Iti sibaymo, nga agbambantay, A mangikalkaluya kenka.