Kastoy, Kapid, Ditoy Hawaii
Kasanon Dagiti Ubbing?
KALUKSAW la unay ni uliteg ti linteg ditoy Amerika maipanggep iti diborsio wenno ti panagsina dagiti agassawa babaen ti pangngeddeng ti korte saan a gapu ta patneng a Katoliko ni uliteg, wenno nairut ti pammatina a saan a rumbeng a mabukra ti karinkari a nasiglot iti sakaanan ti altar, no di ket gapu iti makitkitana a panagsagsagaba ni Kapid Narding, ti buridek nga anakna ken dagiti dua nga annak daytoy, kalpasan a nagsinada ken Brenda, ti asawana a puraw.
Ngem no dadduma, sumken iti pammati ni uliteg a dakkel ti pannakainaig ti saan a panagkasar da Narding ken ti asawa daytoy iti simbaan ti makaigapu a nagpatingga ti kallaysa iti diborsio.
Saan ngamin a binendisionan ti Apo a Namarsua ti panagdennada nga agassawa, kunkunana.
Adda iti umuna a tukad ti kolehio ni Narding iti Filipinas idi naaprobaran ti petision daydi ikit ken ni uliteg isu a naikuyog a nagpa-Hawaii ni Narding. Iti panangituloyna ti kursona dita University of Hawaii, nanobiana ti maysa a taga-New Orleans. Nagtultuloy ti relasionda uray pay idi addan panggedanda nga agpada ditoy Hawaii. Ket idi nagkasarda, iti mayda a gazebo (bassit a bistario) ti nakaangayan ti kallaysa. Maysa a hues ti namasingked iti panagkasarda ta sabali ti relihion ti babai.
Nasayaat ti panagtunos da Narding ken Brenda. Idi gumatang da Narding iti balay, impunno ni uliteg ti urnongna a para iti down payment. Nagkakabbalayda iti baro a pagtaengan ket masansan a da uliteg ken ikit ti agay-aywan kadagiti ubbing.
Ngem kalpasan ti sumagmamano a tawen, nangrugi a limmamiis ti rikna da Narding ken Brenda iti tunggal maysa. Masansan nga agsubangda. Iti naminsan, pinadas ni uliteg a bagbagaan dagiti dua tapno maurnosda a nasayaat ti relasionda ngem isun ti nambaran ti manugangna a nanggurgura kenkuana.
Nakisina da uliteg iti pagtaengan nupay nasakit ti nakemda a mayadayo kadagiti appokoda.
“Bareng maurnosda ti bagbagida no umadayokami,” kinunkuna ni uliteg.
Ngem dimmegdeg ti panagap-apada agingga iti nadissuan ni kapid ti asawana.
“Diak mairusok ti panagsasao ken ti pangug-ugalina,” inrason ni Narding idi salangaden ni uliteg.
Gapu iti dayta a pasamak, nagdarum ni Brenda ket naikkan ni Narding iti Temporary Restraining Order (TRO). Iti TRO, naparitan ni Narding a makaasideg iti asawana. Malaksid iti TRO, kiniddaw ni Brenda ti panagdiborsioda.
(Iti damag ni uliteg, sinugsogan kano ti ina ni Brenda nga agdiborsioda.)
Ditoy Amerika, uray bassit a susik, diborsio ti kapardasan a pangrisut iti parikut.
Idi nayetnag ti pangngeddeng ti korte nga agsina da Narding ken ti asawana, naibilin nga agguduada iti balay ken dadduma a sanikuada malaksid kadagiti alikamen a regalo a kas koma kadagiti alahas. Malaksid iti dayta, naibilin nga agbayad ni Narding iti $600.00 iti binulan a kas child support wenno agpaay iti kasapulan dagiti dua nga annakna iti tunggal bulan.
Ti makadakes, idi mailako ti balay da Narding, nabingay ti naglakuanda ngem saan a naisubli ti kuarta nga insugpon ni uliteg.
“Kasla nagpukaw nga asuk ti urnongko iti pito a tawen!” kinuna ni uliteg. Piman a lakay, panagdalus iti minuyongan ken solar ti panggedanna. Agarup walo nga oras a makutoran wenno mainitan nga aggaik iti inaldaw.
Ngem ti dakdakkel a sakit ti nakemna ket ti pannakayadayona kadagiti appokona. Ti pagdaksanna, mariknana ti iliw dagiti appokona, a kayatda ti maidenna kenkuana, ngem bassit la nga oras ti inkeddeng ti korte.
Iti met biang ni Narding, dakkel a kissay iti sueldona ti $600 iti binulan. Ti makadakes, ni Brenda ti pakaipatpatulodan ti child support babaen ti Child Support Enforcement Agency. Sagudayen ti linteg, saan a mabiangan ni Narding no kasano a magasto ti $600.
Iti naminsan a napan sinukon ni Narding dagiti annakna, nadanonna a naimas ti taraon da Brenda ken ti lalaki a kabbalayna. Adda pay in-inumen dagitoy a red wine. Idi pagimtuodan ni Narding dagiti annakna no nanganen dagitoy, kinunada a saan. Ket idi napanda iti maysa a restauran, kasla mabisbisinan dagitoy.
Saan a nasayaat a linteg daytoy diborsio, kinuna ni uliteg. Ngem ti makadakes, dagiti ubbing ti nangnangruna nga agsagaba! Ken daytoy: Ania ti pagbanagan dagitoy nga ubbing?—O