Saludsodem ken ni Apo Hues
SALUDSOD:
Gapu ti nakaro a dimi panagkinkinnaawatan ken baketko, nagsinakami lima a tawen itan. Addaankami iti dua nga annak, maysa a lalaki ken maysa a babai. Kayatko koman a mawaswas ti bileg ti kasarmi ngem damagko a nangina unay ti magasto. Mapan a P100,000.00, P150,000.00 wenno P200,000.00. Saanko a kabaelan dayta. Ita, mangmangngegko nga adda kano singasing a linteg a pagdebdebateanda iti Kongreso— daytoy maipanggep iti diborsio a bassit laeng ti magasto. Ur-urayek tapno isunton ti panangyulik iti korte iti darum a bassit laeng ti magastok. Apo Madaydayaw a Hues, pangngaasiyo man ta ilawlawagyo no ania dagiti pagsayaatan ken pagdaksan a maited ti panangwaswas iti bileg ti kallaysa wenno ‘tay diborsio a makuna. Adalek dagiti ibalakadyo ket panunotek no ituloyko wenno saan daytoy planok a mangidiborsio ken ni baketko. --Clemente ti Dagupan
SUNGBAT:
Adda nasurok a sangapulo a kaso ti pannakawaswas ti kallaysa nga iniggamak idi addaak pay iti serbisio a kas hues. Inaprobaran ti korte amin dagitoy gapu ta awanen ti maaramid tapno makapagdenna a nasayaat dagiti agassawa. Nalamiis unayen a kasla yelo daydi nabara a panagpimpinnategda.
Ita, tamtamingen met ti Kongreso ti singasing a linteg, ti House Bill No. 7303 wenno An Act Instituting Absolute Divorce and Dissolution Marriage in the Philippines. Inaprobaranen ti Kamara daytoy; ad-adalen met ita daytoy ti Senado. No aprobaran ti Senado daytoy, malimpianto biit, sa mapanton iti ima ti Presidente tapno pirmaanna. No pirmaanna, linteg daytan.
Kas kuna dagitoy appo nga agpampanday-linteg, mabiit ken saan a nagasto ti diborsio nga estilo Filipino. Adda dagiti di umanamong, adda met dagiti pabor. Kasta a talaga.
Iti biangko, mayatak iti dayta diborsio ta adda met dagitay agassawa a danum ken grasa ti kaarigen ti relasionda. Mammaminsan laeng nga agbiagda, apay a pawilantayo ida a mangsapul iti pudno a kaginnasatda?
Ngem, ala, adalem a nasayaat ti kasasaadyo nga agassawa. No adda pay met laeng namnama a makapagdennakayo, aramidenyo dayta, kaasi dagiti annakyo. Saan la koma a ti bagbagiyo ti pampanunotenyo. Kinaimut dayta.
Dagiti met agpangpanggep nga agkallaysa, panunotenyo a nalaing dayta ipapanyo panagkinnari iti sanguanan ni Apo Dios a ninto laeng Patay ti mamagsina kadakayo. Diyo pagarien ti kinaderrepyo a kas lisensiayo nga agkasar. Sabali ti derrep, sabali ti ayat. No diyo mapaggidiat dayta, diyo koma iramraman ni Apo Dios iti panagkinnariyo, kababain.—O