Okeyka, Apong
MALAKSID a paginadenna ti panaglakay wenno panagbaket, nayonan ti Vitamin E ti kinaregta ti sex life. Tipdenna ti oxidation (wenno panagbaliw) dagiti fatty acids a napateg iti pannakaparnuay dagiti sex hormones. Makita daytoy kadagiti kaaduan a taraon a nabaknang iti bitamina, ngem adda dagiti makasapul latta iti Vitamin E supplement a managnaganan iti tocopherols. Karaman kadagiti taraon a nabaknang iti Vitamin E ti kamote, kalunay (spinach wenno amaranth), karabasa, ken lana ti niog.
Sabali pay a bitamina ti Vitamin F, a kasapulan dagiti glandula iti thyroid, adrenal ken prostate glands. Pasayaatenna ti pannakaagsep ti kalsium, bangenanna ti kolesterol, tumulong a mangpasalun-at iti buok ken kudil. Kaaduanna kadagiti makan a nabaknang iti bitamina ti mangipaay met iti umdas a Vitamin F. Maibilang no dadduma a Vitamin F dagiti essential fatty acids (EFA’s). Isu dagitoy ti omega-3 ken omega-6 fatty acids. Adda met ti omega-6 essential fatty acid kadagiti di naluto a mani, bukbukel (legumbre), idinto a ti omega-3 essential fatty acid, adda iti ikan.
* * * Napateg a kankanayon a laglagipen a ti nasayaat a salun-at ti tulbek iti kinaregta iti seks. Nupay maibalbalakad la unay a mangantayo iti adu a nateng ken prutas, dina kayat a sawen a no ad-adu ti kanentayo kadagitoy, ad-adu met ti maalatayo a sustansia ken erbal a pagimbaganda.
Umuna, nasaysayaat no panunotentayo ti umisu nga erbal a para iti espesipiko a sakit a kayattayo a maagasan.
Maikadua, ania man a sobra ket dakes. Umno laeng a kalalainganna laeng ti ipauneg kadagitoy nga erbal, ken nasaysayaat pay no adda umisu a konsultasion.
Ken maikatlo, liklikan ti agsigarilio. Kissayan ti panagsigarilio ti kapaut ti biag iti agingga iti 20 a porsiento, malaksid kadagiti dakes pay nga ipaay dagiti sakit a mainaig met laeng iti panagsigarilio, kangrunaan ti kanser iti bara ken atake iti puso, a mabalin a mangkettel iti biag uray sakbay pay a magteng ti kagudua ti manamnama a kapaut ti biag.
Am-ammo a mangpapatay kadagiti ‘nerves’ inton bumaybayag dagiti droga, nikotina, caffeine, alkohol, ken menthol. Adu a report iti medisina ti mangpabasol kadagitoy a makaigapu iti panaglupes dagiti babbai ken mangpabaog kadagiti lallaki.
* * * Napateg met nga ikagumaanan a maala amin a bitamina nga imet dagiti taraon nga ipaunegtayo. Laglagipentayo a dadaelen ti pudot dagiti bitamina ken dadduma pay a sustansia, isu a saan koma a sobra ti pannakaluto dagiti nateng.
Masapul met a maipalagip a dagiti alkohol, nikotina, droga ken kape, lapdanda ti pannakaagsep dagiti sustansia nangruna dagiti bitamina ken mineral. Mabalin nga agbanag daytoy a maysa a klase ti malnutrision. Ngarud, dagiti mangab-abuso kadagitoy a substansia, addaan iti nakurapay a salun-at ken aglaladutda.
Nasayaat met a laglagipen nga uray no maipaunegtayo ti umisu a kita ken kaadu ti taraon, masapul a laokantayo daytoy iti regular nga ehersisio, umdas nga inana, ken positibo a disposision wenno pampanunot.
Ken kamaudiananna, napateg nga agpadpada ti pisikal ken mental a kinasalun-at iti nasalun-at wenno aktibo a seks. Adu nga eksperto ti mangibaga a ti kabilegan nga aphrodisiac, isu ti panunot.—O