Ading Kosinera
MAYSA kadagiti wagas a panangisagana iti ikan a kas taraon a maidasar a para iti pamiliatayo ti panangaramid iti daytoy nga empanadita. Patienmi a kaay-ayo la ketdi dagiti kameng ti pamiliatayo daytoy, nangruna dagiti ubbing.
Isaganatayo ngarud dagiti sumaganad a ramen.
2 tasa a napirpirsay a lasag ti ikan
1 tasa a patatas, natadtad iti napino
1 kutsara a celery, natadtad iti napino
1 kutsara a lasona, natadtad iti napino
1 kutsara a bawang, natadtad iti napino
1/3 kutsarita a pagtempla (seasoning)
2/3 kutsara nga asin
1/3 tasa a pasas
1/2 tasa a hot sauce
1 kutsara a suka
Para iti Aramaten a Pagbungon (Crust)
1/2 tasa a nayukuyok nga arina
2 kutsara a baking powder
1-1/2 kutsarita nga asukar
1/4 tasa nga ebaporada a gatas
Wagas ti Panagisagana
1. Gisaren ti napirpirsay nga ikan iti bawang, lasona, ken celery.
2. Ilaok dagiti dadduma pay a ramen ngem iddepen ti apuy no mangrugin a maluto nupay malasado pay laeng dagiti ramen. Ipakni pay laeng. Daytoy ti linaon (filling) ti fish empanadita.
3. Iti sabali a malukong, ikabil ti nayukuyok nga arina, baking powder, ken asukar.
4. Ilaok ti margarina, wenno butter, agingga nga agtutukel a kasla kadakkel ti bukel ti mani. 5. Ilaok ti gatas ken ti itlog sa ramasen a nalaing. 6. Iwarakiwak ti arina iti nadalus a lamisaan sa iparabaw ti masa. Ladditen agingga nga umingpis iti 1/8 a pulgada.
7. Iw-iwaen iti agarup 2 x 2 pulgada. Daytoy ti usaren a pangbungon (crust).
8. Mangikabil iti filling iti crust a kas iti panagaramid iti empanada. Pagsabaten dagiti dua nga igid a paset sa pitpiten iti apagisu laeng tapno dumket dagitoy.
9. Prituen dagiti empanadita. Paangsetan ti mantekana sakbay nga idasar.
No kayatyo met iti masanay iti panagproseso iti taraon, mabalinyo ti agsurat iti Presidente iti MMSU (Dr. Shirley C. Agrupis) through the Office of the Vice President for Research, Extension, and Business (Dr. Epifania O. Agustin). Adda dagiti ekspertotayo manipud iti MMSU College of Aquatic Sciences and Applied Applied Technology (CASAT) a kas koma kada Ms. Glezzenda P. Balbuena ken Ms. Carmencita A. Saladino a mangsanay kadakayo.—O