Siled ti Kararag
Basaentayo ti Filipos 4:4-9
Awan koma ti pakadanaganyo, ngem tunggal agkararagkayo iti Dios ket agdawatkayo, diyo liplipatan ti agyaman kenkuana.—Filipos 4:6
ITI uneg ti 14 a tawen, nagtrabahoak iti maysa a pagtagilakuan kadagiti aramaten iti isports idiay Anchorage, Alaska. Iti maysa nga aldaw a panaggapuk iti bodega ken panangitulodko idiay puesto kadagiti sumagmamano a tagilako, sinabatnak iti ridaw ti maysa a makaungunget a parokiano. Kasta unay pungtotna a nagreklamo gapu iti ginatangna iti napalabas. Bayat ti panangdengngegko kenkuana, nakitak ti nakasurat iti sango ti tisertna: “Focus on Jesus.” Napanunotko ken nakunak iti bagik, “Maysaka a managinkukuna a babai!” Ngem dagus a pinalagipannak ti Espiritu Santo: “Ibaw-ingmo kadi met ti panagkitam ken ni Jesus?”
Immangesak iti nauneg ket inannugotko a naglidem ti panagkitak. Inrugik nga ikararagan a siuulimek daydi babai. Nariknak ti talna ti Dios, ket nagkalma daydi babai. Pimmanaw a kas maysa a naragsak a parokiano. Ninanamko ti talna ti Dios iti wagas a diak pay napadpadasan.
Naipalagip manen kaniak ti Filipos 4:6 ket inkarigatak nga agtalimudok ti panunotko ken ni Jesus.
Kararag: Agyamankami kenka, O Dios, iti talna nga itdem kadakami iti tengnga dagiti narikut a kanito. Tulongannakami nga umawag kenka kadagiti kakastoy a tiempo tapno agbalinkami a kalasugan ti ayat ken pannakaawatmo. Amen.
Kapanunotan: Dumteng kadatayo ti talna no agkararagtayo.
Ikararagan: Dagiti Kristiano iti pagtagilakuan.