Ti Tarakenmo ken Sika
MASANSAN a parikut dagiti adda tarakenna nga aso ken pusa dagiti timel. Sepsepen ti timel ti dara dagiti taraken nga aso ken pusa ken uray pay ti tao.
Nagrigat pay met a tiliwen sa pis-iten ti timel gapu iti kapigsa ken kaadayo ti malagtoda. No koma idilig iti kadawyan ti kadakkelna a tao ti timel, makalagto ti tao iti dandani 100 a metro a kaadayo ken agarup a 50 a metro ti kangatona.
No mapaliiw nga adu dagiti timel iti pagtaengan, padasen a laokan iti danum ti dish soap (‘tay likido a sabon a nairanta a pagugas iti lunglongan) sa ikabil iti pinggan wenno malukong. Saan a makalagto nga aglibas ti timel a napan iti pinggan gapu iti kapalet ti solusion. Sukatan laeng daytoy a solusion iti inaldaw.
Ad-adda nga epektibo daytoy a wagas iti rabii. Nokturnal ngamin dagiti timel ket maawisda iti lawag ti kandela a maikabil iti asideg ti napaglaok a dish soap ken danum.
Masapul laeng ti panagannad no aramiden daytoy iti rabii gapu iti peggad iti uram nga ipaay ti nakasindi a kandela.
Mabalin pay a paglaoken ti maysa a litro a suka, kagudua a litro a danum, sangatasa a tubbog ti kalamansi wenno dalayap. Daytoy ti yisprey iti alpombra, muebles ken dagiti pagid-iddaan dagiti taraken nga ayup.
Makaaramid pay iti solusion a mayisprey iti pagtaltalinaedan dagiti timel babaen ti nagukisan ti sitrus. Iwaen iti babassit ti ukis sa ipaburek. Mayisprey ti danum a nasagat manipud iti naipaburek a sitrus.
Epektibo pay ti panagiwarakiwak iti baking soda wenno asin iti suelo, alpombra ken dadduma pay a pagtaltalinaedan dagiti timel. Nasaysayaat pay no isepilio ti baking soda kadagiti sulsuli ken paglemlemmengan dagiti timel.
I-vacuum ti baking soda wenno asin kalpasanna. Isupot dagiti timel a naurnong iti vacuum sa ibelleng iti basuraan iti ruar ti pagtaengan.
Saan laeng a mamimpinsan ti panagaramat kadagiti nadakamat a wagas a pangpatay kadagiti timel. Mabalin nga adda pay laeng saan a nagpessa nga itlog a makaipaay manen iti parikut no makapagpessada.
Mabalin met ti agaramat kadagiti komersial a pagpatay iti timel. Masapul laeng ti adu a panagannad no adda dagiti ubbing, ken uray dagiti nataengan, a mabalin a maapektaran ti salun-atda gapu iti pannakalang-abda iti kemikal a nayisprey.—O