Ti Gasatmo Ita a Lawas
idinto a buybuyaenda dagiti dua nga umadadayo.
“Apay, ania a gapu ti kaaddam?” kinuna ni Regidor idi agwaywayasdan ken Carmen iti maysa nga abong-abong. “Impagarupko man no dinak kayaten a makita?”
“No ibagak a saanen a siak daydi napannakkel a Carmen, dinak kadi pakawanen?”
Nabayag a pinerreng ni Regidor ni Carmen. “Agyamanak unay no kasta. Ngem kasano a nagbalinka a mannakaawat?”
“Gapu ta ay-ayatenka. A saanak gayam a naragsak no patibkerek ti sarak kadagiti pangngeddengmo.” “Dayta kadi laeng?” “Ken makitak nga adda kalintegam. Naragsak unay itan ti San Bernardo. Ket no mabalin, kayatko met ti agbalin nga empleadom, uray clerk laeng.” “Mano met ti kayatmo a sueldo?” “Pisos laeng!” inkatawa ni Carmen.
NALPAS ti irigasion kalpasan ti lima a bulan ken maysa a lawas. Nalayus dagiti taltalon ti San Bernardo ket nagbalin a berde. Saanen a nagsubli dagiti tao kadagiti panggedanda. Insarunoda a binukkual dagiti dagada. Nagmulada kadagiti nateng ken rinugianda metten ti agbunubon iti iraepdanto. Insuro ida ti maysa nga eksperto nga agrikultor nga inawis ni Regidor.
Balligi ti umuna a tawen a panagapit dagiti mannalon iti San Bernardo. Naragsakda iti adu a banag a namalbaliwan ti pagtaenganda. Awanen ti umallatiw iti sabali nga ili tapno mangged. Inaldawda kadagiti taltalon tapno asikasuenda dagiti mulada a nateng ken pagay.
ITI maysa a malem, adda ni Regidor iti tapaw ti natayag a turod a mangtantannawag iti nalawa ken berde a taltalon. Agkankanta ti pusona iti panagballigina. Pagam-ammuan, dinalapus ti alipugpog ti kalgaw. Awanen ti makitana a naldog a garami nga igubet ti nadawel nga alipugpog.
Iti baba, umanangsab ni Carmen a nangisardeng iti isasang-atna. “Agawidtan, Regidor!” nagallatiw ti pukkawna kadagiti turod.
Ngem kasla awan ti nangngeg ni Regidor. Matmatmatanna latta ti taltalon.
Intuloy ni Carmen ti simmang-at. Umanangsab a nangguyod iti takiag ni Regidor. “Intan… malemen!” “Apay?” “Naibusen ti kuartak. Saanakon a maikari nga agtaeng iti daydiay dakkel a balay.”
“Ngem masapul nga agawidta. Uray inton bigat met laeng, rugianta ti mangbangon iti kalapaw no sadiay ti kayatmo a pagyanan a pangrugianta nga agturong iti masakbayan.”
“Kadi? Ah… dandani nalipatakon a maysaka gayamen a mannakaawat.”
Ket siraragsakda a nagkibin a simmalog iti turod.—O