DOT, maragsakan ta nairaman ti Filipinas a kas kangrunaan a pagpasiaran iti Asia
Maragsakan ti Department of Tourism (DOT) iti panangibilang ti Forbes.com iti Filipinas a kas maysa kadagiti kangrunaan a pagpasiaran iti Asia itoy a tawen.
Babaen ti artikulo a napauluan iti “The 5 Spots In Asia That Are Booming With Tourists In 2018,” nadakamat a ti immadu a turista ket gapu iti napasayaat a panagbiahe ken impraestruktura iti Filipinas.
Inraman ti Forbes.com ti Filipinas kadagiti kangrunaan a destinasion iti Asia a kakadua ti Japan, Malaysia, Indonesia, ken South Korea.
Segun ken ni Tourism Secretary Wanda TulfoTeo, ti pannakairaman iti listaan dagiti maipangruna a pagpasiaran ket testamento iti kinaanduar dagiti Filipino ken iti kinapinget dagitoy a mangitandudo iti pagilian a kas natalged ken naragsak a pagpasiaran.
Nadakamat iti nasao nga artikulo a gapu kadagiti pannakapasayaat dagiti lokal nga impraestruktura, addaanen dagiti kangrunaan a pagpasiaran iti pagilian kadagiti domestic airport nga addaan met iti regular a biahe a mapan ken aggapu kadagiti kangrunaan a siudad iti pagilian.
Itay napan a tawen, napapintas ti sumagmamano nga internasional nga eropuerto ken plano a mapapintas pay dagiti sabsabali nga internasional nga eropuerto a kas iti Iloilo International Airport, Bacolod-Silay Airport, Laguindingan Airport iti Misamis Oriental, ken New Bohol International Airport iti Panglao.
Segun iti kaudian nga estadistika iti turismo, nakapasangpet ti pagilian iti 1,406,337 nga internasional a bisita iti Enero ken Pebrero itoy a tawen, mapan a 16.15 porsiento ti ngatngatuanna ngem iti 1,210,817 iti isu met laeng a tiempo idi 2017.
Panagyaman
Agyaman ti Pamilia GappiBautista kadagiti nakipagladingit ken timmulong iti nasayaat a pannakaestimar ti bangkay ni patpatgenda a Eunice G. Bautista bayat ti pannakaimassayagna iti pagtaenganda iti Caliguian, Burgos, Isabela.
Nagserbi ni Eunice nga OFW iti Emirates Palace Hotel, Abu Dhabi a nakatayanna iti atake iti anneurism idi Marso 5, 2018.
Inulila ni Eunice, 39, da Marlou P. Bautista, asawana; Marlah Allyson, bugbugtong nga anakda; ken dagiti nagannak ken kakabsatna.
Naitabon idi agsapa ti Sabado, Marso 30, 2018 kalpasan ti Santa Misa iti simbaan ti Crusader of the Divine Church of Christ, Caliguian, Burgos, Isabela.
Manugang ni mannurat ti Bannawag Prescillano N. Bermudez ti pimmusay.