Ni Jenny ti Miss Virginia Tobacco 2018
“ADDAAK nga agtaktakder iti sanguananyo a napnuan panagtalek, a mangipakita nga uray napugotak, ammok a napintasak latta iti bukodko a wagas.”
Dayta ti pannakaipatarus iti Ilokano ti sungbat ni Jenny Claire Reyes Raquel iti saludsod kenkuana iti Question and Answer portion wenno kaudian ken napateg a paset ti Search for Miss Virginia Tobacco 2018 a naangay iti Candon Convention Center, Siudad ti Candon, idi Marso 23. Paset ti pasalip ti tinawen a Tobacco Festival, wenno piesta ti Siudad ti Candon.
Iti nabagas a sungbat ti balasang, iti natalek a lunglung-ayna iti rugi pay laeng ti panagrampa dagiti 12 a kandidata, manipud iti casual agingga iti swimwear ken gown competition, iti di mapunas a nasam-it nga isem a mangiparangarang a kaay-ayona iti araramidenna, maibagasan idin a kabaelanna a gaw-aten ti korona.
Pudno, ta saan a napaay ta ti naganna ti naiwaragawag a Miss Virginia iti dayta a rabii. Kaduana iti salip dagiti kandidata a naggapu kadagiti nadumaduma nga opisina ti National Tobacco Administration iti uppat a probinsia ti Rehion Uno a pakaimulmulaan ti tabako.
Agtawen laeng iti 19 ni Jenny, maysa kadagiti kaubingan iti kompetision, agtayag iti 5’5” ken no ar-arigen, isu ti kangingisitan iti kudil, kas iti nadakamatna, kadagiti amin a kandidata. Ngem addaan ketdi daytoy ti pammagi a 34-24-34 (vital statistics) ken nayawidna pay ti pammadayaw a Best in Swimwear.
Kadua ni Jenny, mangibagi ti NTA Candon, a nakoronaan iti dayta a rabii da Maegan Sanglay, Miss Philippine Tobacco Institute (First Runner-Up), ken Patricia Anne Nichole Bangug, Miss National Tobacco Administration 2018 (Second Runner-Up), agpada a nangibagi ti NTA La Union.
Gapu iti adu a padas ni Jenny kadagiti salip iti kinapintas, ti natural a panagtalekna iti bagina ken iti Namarsua ti nangitunda
kenkuana iti kaudian a balligina. Inkakaubinganna ti nakisalsalip kadagiti beauty pageant, ken adu metten dagiti nagun-odna a pammadayaw. Kinapudnona, iti uneg ti uppat a bulan laeng, tallo a korona ti nayawidna iti pagtaenganda iti Nanguneg East, Narvacan, Ilocos Sur.
Idi Disiembre 2017, nakoronaan a Miss Narvacan iti panagpiesta ti ili. Gapu iti panangabakna, imbagianna ti ilina iti tinawen a Miss Saniata Ilocos Sur, kas paset ti Kannawidan Ylokos Festival iti Ilocos Sur. Nakaronaan ditoy a Miss Saniata Ilocos Sur World, ken iti agtapos ti Marso, ti Miss Virginia Tobacco 2018.
Estudiante ni Claire iti Ilocos Sur Polytechnic State College, Sta Maria Campus, iti kurso a Bachelor of Science in Agriculture. Addan iti maikadua a tukad.
Segun kenkuana, dakkel a tulong kenkuana ti panangsanay kenkuana ti agdama a manager-na a ni Edgardo General, akinkukua iti Beauty and Bar Saloon ti Siudad ti Candon.
Ulilan iti ama ni Jenny Claire, ket ti inana, ni Maricel Raquel, ti mangisaksakad iti pamiliada babaen ti panaglaklakona iti nateng ti tiendaan ti ilida.
Arapaap ni Jenny ti makaturpos iti kolehio ken maaddaan ti natalged a trabaho para iti masakbayan ti pamiliana. Ket itugotna dagiti padasna iti pannakisalsalipna kadagiti beauty pageant iti pannakibalubalna kadagiti risiris iti biag— a patienmi a pagballigianna gapu iti kaadda ti panagtalekna iti bagina ken iti Dios.—O