Sumekseksi ni Sue?
ADU ti nangdayaw iti baro a pukis ni Robin Padilla. Iti pannakayam-ammona a maysa kadagiti hurado iti “Pilipinas Got Talent Season 6,” adda pay ketdin nangipukkaw kenkuana iti “astig.”
Uray iti teleserye a “Sana Dalawa Ang Puso,” saan laengen a ti pareha da Richard Yap ken Jodi Sta. Maria ti tagtagiurayen ti tao. Addan dagiti mangibagbaga nga ‘agbagay’ da Robin ken Jodi.
Pudno met ngamin nga iti baro a pukisna, kasla nakabangbanglo ni Robin ken immubing ti langana. Iti edadna a 50, agarup katawenanna laengen no langlanga da Victor Silayan, Paolo Paraiso ken Boom Labrusca a kakaduana iti nasao a teleserye.
* * *
Agpayso ti pagsasao a no nabunga ti maysa a puon ti kayo, adu ti mangbato iti daytoy. Kas iti kasasaad da Enrique Gil ken Liza Soberano. Adu ngamin ti mangibagbaga nga isu a maat-atiw iti reyting ti teleseryeda a “Bagani” iti ABS-CBN ta saan nga umisu kadakuada ti akem a kas nagkauna a tattao iti Filipinas. Adda ngamin dara nga Amerikana ni Liza idinto nga adda met dara nga Espaniol ni Enrique.
Ti imasna, iti kaudian a panangsiripmi iti reyting, nangatngato pay met laeng ti “Bagani” ngem ti kagiddanna a programa iti GMA-7.
* * *
Impasirip manen ni Sue Ramirez ti kinaseksina iti paskilna iti Instagram a naka-two piece. Ayna, nakaay-ayat dagiti komento dagiti netizens. Uray dakami, naklaat ta kaano laeng a nakitami, saan pay met nga ania a seksi. Segun iti nadakamatmi a ladawan, ne, nakasekseksi metten.
Iti sabali a bangir, ad-addan a makapikapik dagiti eksena iti teleserye a “Hanggang Saan” a pagbidaanda kada Arjo Atayde ken Sylvia Sanchez a kakaduada da Teresa Loyzaga, Ariel Rivera, ken dadduma pay.
Adda dagiti nangikissiim nga agingga laengen daytoy iti agtapos ti Abril.—O