Dap-ayan 2018 ken Maika-50 nga Anibersario ti GUMIL Filipinas: Nabalitokan a Panagkakadua, Narangpaya a Literatura Neyo Mario E. Valdez

Dap-ayan 2018 ken Maika-50 nga Anibersario ti GUMIL Filipinas

(Umuna iti Dua a Paset)

SAAN a sinsinan a gapuanan ti isasagpat iti limapulo a tawen ti maysa a panagkakadua aglalo no grupo daytoy dagiti mannurat nga agtaud kadagiti nadumaduma a probinsia wenno rehion, ken agduduma ti panirigan, edad, propesion, ken estadoda iti biag. Ngem pinaneknekan ti GUMIL Filipinas (Gunglo Dagiti Mannurat nga Ilokano iti Filipinas ken Ballasiw-Taaw) a kabaelanna a laktawen dagita a panagduduma tapno laeng maitandudona ti kangrunaan a panggepna: ti pannakapadur-as ken pannakataginayon ti arte ken kultura ti puli nga Ilokano aglalo ti literaturana.

Kas kuna ni Vilmer V. Viloria, Presidente ti GUMIL Filipinas ken agdama a Board Member ti Cagayan, saanen a pagduaduaan ti pannakabigbig daytoy a “katitibkeran ken kadadakkelan” a gunglo dagiti mannurat nga Ilokano ditoy pagilian ken uray iti ballasiwtaaw.

“Adda dagiti grupo a naikupinen iti pakasaritaan, ken adda met dagiti nagtultuloy ti panagdaliasatna a nangimarka iti bukodna a pakasaritaan. Maibaga nga adda iti maikadua a grupo ti GUMIL Filipinas a maysa metten a mabigbig nga institusion iti Ilokandia,” panangilawlawag ni Viloria.

Iti panagsasarak dagiti mannurat para iti pannakapadayaw dagiti nangabak iti Salip iti Sarita nga insayangkat ti Bannawag ti nangipasngay iti GUMIL Filipinas iti Siudad ti Baguio idi Oktubre 19, 1968. Gapu iti narugian a dana ti liderato da Arturo M. Padua, kolumnista ti Bannawag ken politiko a taga-Sison, Pangasinan, ken dagiti editor idi ti Bannawag a kas kada Gregorio C. Laconsay, David D. Campañano, Guillermo R. Andaya, Juan S.P. Hidalgo, Jr., Jose A. Bragado, ken Dionisio S. Bulong, ken dagiti mannurat ti Bannawag a nangirugrugi iti panagkakadua dagiti mannurat iti bukodda a lugar a kas kada Pelagio A. Alcantara, Gregorio T. Amano, Cristino Inay, Joven F. Costales, Pacita C. Saludes, kdp., nagbalin a modelo ti GUMIL Filipinas iti panagkakayammet dagiti mannurat nga Ilokano para iti maymaysa a panggep, nga isun ti nagbalin a modelo ti panagkakadua dagiti simmarsaruno a mannurat agingga iti agdama.

Ti kaburnok ti nagatendar iti Dap-ayan 2018, ti tallo-nga-aldaw a nailian a kombension ken literary seminar ti GUMIL Filipinas iti Moonlite Paradise Resort iti Barangay Diora-Zinungan, Santa Ana, Cagayan idi Abril 20 agingga iti 22, ti mangipakita iti kinasanikar latta ti gunglo. Naiballaet iti Dap-ayan ti Maika-50 a Nabalitokan nga Anibersario ti GUMIL Filipinas a naangay iti rabii ti Abril 21 babaen ti programa a naawagan iti “Rabii ti Selebrasion ken Pammadayaw.”

Naragsakan ti GUMIL Cagayan (idauluan ni Freddie P. Masuli), ti nangsangaili ti selebrasion, iti kaadu dagiti dimmanon iti lugar ti selebrasion iti laksid ti kaadayo ti ili ti Santa Ana, arigna adda daytoy iti ungto nga Amianan a Daya ti Luzon wenno 622 a kilometro manipud iti Manila wenno nasurok a 10 nga oras a biahe ti bus para iti kaaduanna kadagiti delegado nga aggapu pay iti Ilokos.

Ngem ammo dagiti timmabuno ti kinaespesial ti selebrasion— ta nabalitokan nga anibersario ti gunglo daytoy— isu a kas itay kunadan, saanda a sinamir a binallasiw dagiti adu a karayan ken bantay; ti nasken, makipagrambakda iti pannakadanon ti gungloda iti daytoy nabalitokan a panagtawenna a dinton maulit pay.

Iti listaan ti Registration ken Reception Committee a buklen dagiti kameng ti GUMIL Gonzaga, 210 ti dagup dagiti nagrehistro (saan a nairaman dagiti dimmaw-as laeng para iti Rabii ti Pammadayaw idi Abril 21).

Ken napukaw met ti bannog ken kettang dagiti delegado a simmangpet ta napintas ti nadanonda nga aglima-ektaria a resort a naidarnap iti igid ti baybay. Iti kapaut ti kombension, naaddaanda pay iti gundaway a timmapog ti ipagpampannakkel ti resort nga infinity pool ken nagpalamiis kadagiti bahay kubo iti babaet dagiti narukbos a kayo iti nalawa a solar.

Dagiti delegado a saan a nalaon ti resort, naipanda iti maysa met laeng resort, ti Orquidia Beach Resort, nga adda laeng iti asideg.

Ni Assistant Secretary Kristian Ablan ti Presidential Communications Operations Office (PCCO), kaduana da GF President Vilmer V. Viloria (kanigid) ken GF Vice-President Remy N. Albano.

Da Eden Cachola-Bulong ken Cles B. Rambaud, kas Leona Florentino Awardee ken Pedro Bucaneg Awardee, kas panagsaganadda.

Dagiti nangabak iti on-the- spot poetry writing contest ti Puntanians of Italy kaduada ni GF Director Ben P. Pacris, mangimaton (maikapat iti kanigid) ken dagiti naghurado a da Daniel L. Nesperos ken Roy V. Aragon (umuna ken maikadua iti kanigid), da...

Dagiti nangabak iti Salip iti Sarita ti ALVIYA 2018, da Roy V. Aragon, Umuna a Gunggona (maikapat iti kanigid), ken Errol L. Abrew, Maikatlo a Gunggona (maikapat iti kanawan). Nairaman iti ladawan dagiti naghurado, da Dionisio S. Bulong (maikadua iti...

Iti panangyalnag dagiti autor iti baro a libroda. Agpakanawan: Norberto D. Bumanglag, Jr. ( Operation: Drop Venus); Joel B. Manuel ( Naggasatkan, Quiter!), Rolando A. Seguro, Jr. ( Ti Kotse ni Iliong ken Dadduma Pay a Sarita), Jose P. Urata ( Laglagip,...

Da Anna Liza Madayag Gaspar ti Piddig, Ilocos Norte (Maika-5 a Gunggona, RFAAFIL Daniw) ken Ronnie E. Ronnie E. Aguinaldo ti Calayan, Cagayan (Maika-2 a Gunggona, RFAAFIL Sarita).

Iti pannakaipaay ti Outstanding Leadership Award kadagiti pasado a presidente ti GF. Agpakanawan: Dionisio S. Bulong ken Jose A. Bragado. Yawawat met ni GF President Vilmer V. Viloria ti pammadayaw a para iti daydi Dios-ti-aluadna a Pelagio A....

Ni Roselyn C. Campano ti Caroan, Gonzaga, Cagayan iti panangawatna iti pammadayaw iti panangyalatna iti Maika-2 a Gunggona iti Salip iti Sarita ti 2nd Mario Abinsay Albalos Foundation Literary Awards manipud kada Ching Alcausin (kakanigidan) ken...