Gemgem ni Estong Rodolfo D. Agatep, Jr.
“HAAN, bro, haanko kayat a kadinnanog dayta a tao,” insungbat ni Kadio idi damagen ni Estong no kayatna a kalabanen iti boksing ni Julio a tagabangir a sitio. Ayaywen ni Estong a mangibagi iti purokda iti umadani a piestada. “Nagtatangken dagiti gemgemna!”
“Adda met glabs!” indurog ni Estong. “Uray ngata,” insungbat ni Kadio. “No mapuruanak iti gemgemna, adayo nga ad-adda buya ti naitupra a tirem no maidasigto iti rupak.” “Adayo a mapasamak dayta, bro. Natangken dayta pammagim ken nabanegka pay. No panunotem a nalaing, kabaelan a sarapaen dayta napuskol a rupam ti danogna.” Ngem nagtalna met la a dagus ni Estong idi mapanunotna a madi ti angawna. Nagdumog ken nagngilangil iti nainayad sa nagammusay.
“Kayatmo ta dayta rupam ti danogek?” ngimmato ti timek ni Kadio. “Kayatmon sa ketdi nga umpes dayta napunno’t angin nga ulom, a!”
“Pasensiakan, bro, maayatanak ngamin a mangpanunot a bugbogem daydiay napangas a Julio iti uneg ti ring. Ammom met no ania ti basolna kaniak daydiay gorilia a nagmaskara a tao.” Nababan ti boses ni Estong.
Nagkalma ni Kadio. Naasian ken ni Estong ta nalagipna ti kapay-an ti adingna ken ni Julio sipud panagubingda. Pinnerengna ti “kabsatna.” Ammona idi pay nga ikarkararag ni Estong nga adda mangbulbullo ken ni Julio. Isuna koma. Ngem dina kayat ti makikabkabil.
“Ala, wen, bro, pagustuanka tapno makaikaroak met kadagiti kinasayaatmo kaniak,” kinunana a timmakder a nangingato iti gemgemna. Uray la a nagpaggaak ti tuleng a lilangna a nakakita kenkuana manipud iti bangir a kalsada ket natinnag ti La Campana nga ammalna.
Nasinged da Kadio ken Estong. Idi ubbingda pay, kanayon nga agkaduada uray no sadino ti papananda. Kasla saan ida a mapagsina ta uray iti pannaturog, agkaatagda. Idi nagbasada, nagkaabayda iti tugaw; agsangoda a mangan no tiempo ti recess; agkuyog nga mapan ken agawid manipud eskuela. Naggiddanda pay a nagsardeng a nagbasa.
Dies burias ti awag dagiti pumurok kadakuada. Mayarigda ngamin iti burias nga agsupadi ti amada. Ni Estong a nakuttong a nangisit, isu kano ti burias a kababoyan a nakudidit. Ni met Kadio a napudaw ti anak ti puraw a baboy; dakkel ken nalukmeg. Ti dies, numero a mapataud no aggiddanda a magna nga akinkanawan ni Estong ken akinkanigid ni Kadio.
Narapis ni Estong ngem awan makaitured a mangkarit kenkuana ta ammo ti pumurok nga adda ni Kadio a mangisakit kenkuana. Tallo ti tawenna idi maulila. Natay dagiti nagannak kenkuana idi lumned ti MV Santiago a nakidinnungpar iti MV Roxas iti nagbaetan ti Batangas ken Mariduque. Nabartek ti watchman ti barko a naglugananda ket dina nakita ti umasidegen a didigra ta nairana a nakaparintumeng ken agsarsarua. Nakalasat ti pagkatlo iti napagtipon a bilang ti tao ti dua a barko a pakairamanan ti watchman nga aksidente a nangalaw iti ubing a naipisok iti styrofoam a tumtumpaw ta ipagarupna no adda kargana a nabalor