Saludsodem ken ni Apo Hues
tarigagay ken panggep ti gunglo iti napalabas a 50 a tawen a nakatulong pay a dakkel iti pannakaitandudo ti Kurditan ni Ilokano; ken ti Presidential Awards for Outstanding Service a kas pammigbig met kadagiti saan a kameng a nakaipaay iti naisangsangayan a tulong ken serbisio iti GUMIL Filipinas.
Segun ken ni Mario T. Tejada, GF Director ken nagpaay a Chairman ti Awards Committee para iti selebrasion, nga adu ti “deserving” a mairaman pay koma a mapadayawan, ngem limitado laeng iti 50 a kameng a kas simboliko a bilang ti selebrasion. Ngem inlawlawagna a napili dagiti napadayawan babaen ti nominasion manipud kadagiti Chapter President ken sumagmamano nga indibidual, nga inarisit ti Awards Committee ken pinatalgedan dagiti kameng ti Hunta Direktiba ti GUMIL Filipinas.
Nagatendar a nangawat ti bukodda a sertipiko ken medalion da Djuna R. Alcantara, Danilo A. Bautista, Prescillano N. Bermudez, Jose A. Bragado, Dionisio S. Bulong, Norberto D. Bumanglag Jr., Eden Cachola-Bulong, Eliseo B. Contillo, Francisco Dela Cruz, Virgilio D. Domaloy, Hermilinda T. Lingbaoan-Bulong, Ben P. Pacris, Clesencio B. Rambaud, Elizabeth Madarang-Raquel, Antonio P. Urata, ken Arthur P. Urata. Adda met pannakabagi ti pamilia dagiti dadduma a napadayawan a pimmusayen a kas kada Samuel F. Corpuz nga imbagian ti asawana a ni Estrella Corpuz, Pelagio A. Alcantara nga imbagian ti anakna a ni Djuna, ken ni Roland P. Urata nga imbagian ti kabsatna a ni Jose P. Urata.
Naipaay met ti Outstanding Leadership Award kadagiti pasado a presidente. Personal nga inawat dagitoy da Jose A. Bragado, Dionisio S. Bulong, Elizabeth-Madarang Raquel, ken Arturo P. Urata. Saan a nakadar-ay dagiti dadduma a pasado a presidente a kas kada Honor Blanco Cabie, Baldovino Ab. Valdez, ken Vivencio Baclig, idinto a pimmusayen da Arturo M. Padua, Leonardo Q. Belen, Godofredo S. Reyes, Reynaldo A. Duque, ken Pelagio A. Alcantara. Personal nga inawat ni Djuna R. Alcantara, nagpapaay met a Sekretaria-Heneral ti GF ti plake ken medalion para ken ni tatangna (Pelagio A. Alcantara) a nangipeksa, idi maited ti gundawayna nga agsao, iti panagyamanna gapu iti naisangsangayan a pammigbig ti GUMIL Filipinas iti amana ken iti panagballigi dagiti agdama nga opisial a nangiwayat iti naidaklan a selebrasion.
Naiwayat pay iti Rabii ti Selebrasion ti pannakapadayaw dagiti nangabak kadagiti nadumaduma a salip iti panagsurat a kas iti 2nd Mario Abinsay Albalos Foundation Literary Awards, 16th Reynald F. Antonio Awards for Iluko Literature (RFAAFIL), Pasalip Alex Vicente Yadao (ALVIYA) iti Sarita, ken AMMA Foundation Literary Awards (AMMAFLA).
Saan a nakadar-ay ni Remedios S. Tabelisma-Aguillon ti Koronadal City, South Cotabato a nangyalat iti agpada nga Umuna a Gunggona iti 2nd Albalos Awards ken iti AMMAFLA. Ngem nakadar-ay ketdi dagiti sumagmamano nga awardee a kas kada Roselyn C. Campano ti Gonzaga, Cagayan (Maika-2 a Gunggona, Albalos), Dexter M. Fabito ti Pamplona, Cagayan (Maika-3 a Gunggona, AMMAFLA), Roy V. Aragon ti Dupax Del Norte, Nueva Vizcaya (Umuna a Gunggona, ALVIYA), Errol L. Abrew ti Caba, La Union (Maika-3 a Gunggona, ALVIYA). Ronnie E. Aguinaldo ti Calayan, Cagayan (Maika-2 a Gunggona, RFAAFIL Sarita), ken Anna Liza M. Gaspar ti Piddig, Ilocos Norte (Maika-5 a Gunggona, RFAAFIL Daniw).
Nayawat met iti dayta rabii ti pammadayaw kadagiti nangabak iti on-the-spot poetry writing contest a tinawen nga is-isponsoran ti Puntanians of Italy (Artemio Raguindin Rome-Anselmo Racadio Naples) babaen ti panangilungalong ni GF Director Ben P. Pacris. Ni Jobert M. Pacnis ti Ballesteros, Cagayan ti nangyalat ti Umuna a Gunggona babaen ti daniwna a “Kumpay” a nakapudno unay iti
tema ti selebrasion. Kadua ni Pacnis a nangabak da Hilario Espiritu Jr. ti Pagudpud, Ilocos Norte, Maika-2 a Gunggona; George Placido ti Bacarra, Ilocos Norte, Maika-3 a Gunggona; Renato Taylan ti Bacarra, Ilocos Norte, Maika-4 a Gunggona; ken Eliseo B. Contillo ti Narvacan, Ilocos Sur, Maika-5 a Gunggona.
Maysa ketdi a napintas a damag ti indanon ni Assistant Secretary Kristian Ablan ti Presidential Communications Operations Office (PCCO) a naawis a Kangrunaan a Sangaili para iti Rabii ti Pammadayaw. Biagen ti pamilia Ablan ti Governor Roque Ablan Awards for Iloko Literature (GRAAFIL), ti maysa kadagiti kaunaan ken kapautan a naisayangkat a pasalip iti panagsuratan iti Kurditan nga Ilokano a naipanagan iti sigud a gobernador ti Ilocos Norte a ni Roque Ablan, ken apong a lakay ni ASec Ablan. Nagpaut ti nasao a pasalip iti dua a dekada wenno manipud iti 1976 agingga iti 1996.
Segun ken ni Ablan, mabalin a marugian ti panagsubli ti pasalip inton umay a tawen, a nakaragsakan unay ni Prescillano N. Bermudez a nagpaay a Secretariat ti GRAAFIL ken sumagmamano a mannurat a nangabak metten iti pasalip, nga adda iti dayta a rabii, a kas kada Ben P. Pacris, Roy V. Aragon, Daniel L. Nesperos, Cles B. Rambaud, Renato A. Taylan, Joel B. Manuel, Virgilio D. Domaloy, ken Danilo A. Bautista.
Kinarit ni Ablan dagiti mannurat a pabaknangenda ti kina-Ilokano dagitoy tapno adda maibinglayda a kas Filipino. Imbilangna pay dagiti mannurat nga Ilokano a napateg a katakunaynay ti nasional a gobierno iti panagdur-as ti pagilian ken iti pannakaiwayat dagiti proyekto ti gobierno a para iti pagsayaatan saan laeng dagiti Ilokano no di pay dagiti amin a Filipino.
Inawat ni ASec Ablan ti Presidential Awards for Outstanding Service para iti GRAAFIL ken iti daydi apongna a baket a ni Manuela Ablan a nangilungalong ti GRAAFIL.
Nagpaay nga emcee iti Rabii ti Pammadayaw da GF Director Eliseo B. Contillo ken GF Auditor Estela Bisquera-Guerrero.
(Adda tuloyna)