Padasem Daytoy, Kailian
INTON Hunio 6-8 itoy a tawen, maangay ti Sima Asean Agribusiness Show iti Bangkok, Thailand. Ita pay, adun a Filipino ti nangipeksa iti ayatda a dumar-ay iti nasao nga agribusiness show. Dakkel ngamin nga okasion a para iti agrikultura daytoy a pakipartisiparan ti nasurok a 300 a kompania a mainaig iti agrikultura.
Mairaman kadagiti nangipeksa iti tarigagayda a mapan dumar-ay iti Asean Agribusiness Show ti grupo ni Eugene Gabriel, presidente ti kompania a Right Agri a mangisaksaknap iti panagusar kadagiti moderno a ramit iti panagtalon a kas kadagiti makinaria, solar a bomba ti danum a pagpasayak, ti napasayaat a pagpakan (feeds) dagiti baka a kas iti ‘silage,’ pagpakan iti baboy ken dadduma pay a dingo.
Mapanto met ti grupo ni Arsenio “Toto” Barcelona ti Harbest Agribusiness, ni Phillip Ong ti Tateh Feeds, ken ni Gonzalo Catan ti Mapecon. Sumurotto met ni Dr. Rene Sumaoang iti grupo ni Eugene Gabriel.
Dagiti nadumaduma a teknolohia iti agrikultura ti panggep a kitaento dagiti dumar-ay nga aggapu iti Filipinas. Kas kuna ni Dr. Sumaoang, agsapulto kano iti makinaria nga agibotelia kadagiti likido a produkto a kas iti suka ken patis. Ni ngamin Dr. Sumaoang ti agar-aramid kadagiti suka (adda silina) ken patis nga adda markana a Bonus ken ilaklako ti SM Supermarket.
Agsapulto kano pay ni Dr. Sumaoang iti makinaria a pagaramid iti ‘silage’ wenno pagpakan kadagiti karnero, baka, ken dadduma pay nga ayup; ken daytay makinaria a pagaramid iti pellet nga abono ken feeds.
Ti met grupo ni Eugene Gabriel, agsapulto met kadagiti baro a ramit iti panagtaraken kadagiti magatgatasan a baka. Interesadoda iti daytoy ta isuda ti mangimanmanehar kadagiti magatgatasan a baka iti Isabela State University iti Echague. Panggepda ti makaaramid iti modelo a proyekto iti panagtaraken kadagiti magatgatasan a baka a mabalin a pagadalanto met dagiti agad-adal iti kurso nga agrikultura ken dagiti pribado a mannalon nga
interesado iti panagtaraken kadagiti baka a para iti gatas a maitedda.
Kas kuna ni Pauline Alary, maysa kadagiti coordinator ti trade show, a nadumaduma a makinaria a para iti mekanisasion ti agrikultura ti yeksibitto dagiti kompania nga aggapu kadagiti nadumaduma a paset ti lubong. Maibilang ditoy dagiti babassit a makinaria a maibagay kadagiti naiilet a talon iti Asia. Addanto met dagiti dadakkel a makinaria a maibagay kadagiti nalawa a pagmulaan.
Mairaman kadagiti kompania nga agyeksibit dagiti aggapu iti Japan, Taiwan, India, China, Turkey, Korea, Europa, Australia, ken Amerika. Sabalinto met dagiti agyeksibit kadagiti ramit a para iti greenhouse, pagpasayak, ken dagiti kabaruanan nga abono, organiko man wenno saan.
Dagiti Seminar
Inaldawto met a maangay dagiti seminar ken pannakaidemonstrar dagiti nadumaduma praktikal a wagas iti tay-ak ti agrikultura. Maysa kadagiti maitampok iti seminar dagiti proyekto nga inrusat ti pimmusayen nga ari ti Thailand, ni King Bhumibol Adulyadej nga am-ammo itan a kas King Rama IX.
Adu dagiti proyekto a sinupsuportaran ti Ari. Dakkel a suporta ti impaayna tapno maisaknap ti panagtaraken kadagiti baka a magatgatasan. Pagarigan ditoy ti panagbalinna a patron ti kadakkelan a kooperatiba dagiti mannalon nga agtartaraken kadagiti magatgatasan a baka— ti Nongpho Dairy Cooperative nga addaan iti 50,000 a magatgatasan a baka. Ti Ari ti nangted iti dakkel a puonan ti kooperatiba. Ket ti met kooperatiba, dakkel ti it-itedna a dibidendo kadagiti kamengna iti kada tawen.
Saan met nga al-alaen ti Ari ti dibidendona. Ititedna daytoy a kas tulongna iti panagbasa dagiti annak dagiti mannalon a kameng ti kooperatiba, iti pannakaiwayat dagiti panagsukisok maipanggep kadagiti magatgatasan a baka, ken para iti maawawagan iti extension wenno ti pannakaisaknap dagiti baro nga ammo maipanggep iti agrikultura.
Sigurado nga adunto dagiti baro nga idea a mapidut dagiti kadaraan nga agatendar iti Asean Agribusiness Show. Inkaminto met ket namnamaenyo nga ibinglayminto kadakayo no ania dagiti naadalmi iti nasao nga agribusiness show.—O