Siled ti Kararag
Dagiti Nagregget
Timmabuno dagiti mabigbigen iti kurditan Ilokano, kas koma dagiti agpapada a naipaayanen iti Pedro Bucaneg Award a da Jose A. Bragado, Dionisio S. Bulong, Prescillano N. Bermudez, ken Edilberto H. Angco, ken dagiti naipaayan iti Leona Florentino Award a da Virginia A. Duldulao, Linda T. Lingbaoan, ken Elizabeth Madarang-Raquel. Sinaksian dagitoy ti pannakapadayaw met a Bucaneg Awardee ni Cles B. Rambaud, ti Pinili, Ilocos Norte ken agdama nga editor ti Bannawag, ken ti pannakaipaay met ti Florentino Award ken ni Eden Cachola-Bulong ti Narvacan, Ilocos Sur.
Iti panagyaman ni Rambaud kadagiti kakaduana iti Bannawag manipud nangrugi a nagkameng agingga nga isu ti nagbalin a kangatuan nga editor, impakitana a dakkel ti akem ti magasin saan laeng nga iti biangna no di pay ket kadagiti padana a Gumiliano a kaaduanna ti nagsurat ken agsursurat pay laeng iti magasin a “saan a makatakder ni mannurat nga is-isuna iti laksid a ni mannurat, ad-adda a makasurat no awan ti mangsingsinga kenkuana; agsakdonto latta ni mannurat iti sirib manipud iti aglawlawna, agpakibinto latta a kas iti panangkibkibin kenkuana dagiti dadakkelna idi agsursuro pay laeng a magna.”
Iti met panagkakadua a nakita ni Cachola-Bulong, a maysa kadagiti kaunaan a kameng ti GUMIL Filipinas, a nakatulong a mangar-aron iti essemna nga agsurat ken makikadkadua latta kadagiti kameng ti gunglo nga imbilangnan a maikadua a pamiliana,
Ti ngarud nadekket a panagkakadua ti mangipalagip latta met iti panggep dagiti immun-una a Gumiliano ken Gumiliana a pakaibilangan ni Cachola-Bulong a nangirubuat iti GUMIL Filipinas. Ti gapuananda ken dagiti nangitultuloy ti panggep ti gunglo ti ipekpeksa ti tema ti selebrasion a “Nabalitokan a Dawa, Narangpaya a Literatura.” Dagiti kameng ti GUMIL Filipinas ti nangitukit iti dayta a panggep nga isun ti nagbalin a dawa, a pagtaudan dagiti magapas a binukel a para kadagiti sumarsaruno a kaputotan dagiti Gumiliano/Gumiliana wenno mannurat, a pagtaudanto met dagiti bin-i a para iti agtultuloy nga irarangpaya ti kurditan dagiti Ilokano.
Ammo dagiti bangolan a mannurat wenno immun-una a nangtagiben iti GUMIL Filipinas, a no sumagpat ti nabalitokan a panawen ti maysa a banag, naisangsangayan dagitoy kadakuada. Kas makita man iti regget latta ni Apo Joe Bragado nga agatendar latta iti tinawen a kombension, ken alaenna latta ti gundaway a maipaay kenkuana a mangibinglay kadagiti padasna a nagsursurat ken kas kameng ti GUMIL Filipinas.
Timmabuno met dagiti mannursuro iti eskuela a nagbalin metten a kataktakunaynay ti GUMIL Filipinas tapno mayadal ti lengguahe nga Ilokano kadagiti pagadalan babaen ti programa a K to 12 ti Department of Education (DepEd), wenno ti pannakaisuro ti Nakayanakan a Pagsasao (Mother Tongue) a mangrugi iti Kinder agingga iti Grado Tres. Kaaduanna kadakuada ti naggapu iti DepEd Urdaneta City nga idauluan ni Dr. Edmundo Bisquera, DepEd Supervisor; ken dagiti mannursuro iti Gonzaga, Cagayan nga idauluan ni Mario S. Ascueta, Prinsipal ti Caroan Elementary School iti Caroan iti isu met laeng nga ili. Ngem kaaduanna ketdi kadagiti mannurat a nakaipablaaken wenno agipabpablaak kadagiti sinuratda iti Bannawag ket isu dagiti mannursuro kadagiti pagadalan.
Sipud pay naiwayat ti K to 12 Program, naikalawa ti ridaw ti GUMIL Filipinas para kadagiti mannursuro ta dagitoy ti napusgan a mangisuro iti umisu a pannakausar ti Ilokano, ken mangirugi a mangipatmatmat no ania ni Ilokano, wenno no ania ti kababalin ken kulturana.
Nagatendar met dagiti estudiante ti University of Northern Philippines a mangbukel iti GUMIL UNP a kinuyog ni Dr. Eleanor R. Belizar, head ti UNP Center for Ilokano Studies and Museum.
Rabii ti Selebrasion ken Pammadayaw
Maysa a napateg a paset ti Rabii ti Selebrasion ken Pammadayaw ti pannakaipaay iti GF Tan-ok Gumiliano/Gumiliana Awards a kas pammigbig ken panagraem ti GUMIL Filipinas iti napateg nga akem dagiti kameng iti pannakapadur-as dagiti