Ti Tarakenmo ken Sika
ADDA dagiti gundaway a madesgrasia dagiti kayanak nga uken a kas iti pannakapandag wenno pannakaiwaswasiwas ti kadena ti ina nga aso no nakagalut daytoy. Daytoy ti rason no apay nga isina ti dadduma nga agtartaraken iti aso ti ina kadagiti annakna. Yasidegda laeng dagiti uken no agsusoda.
Natalged para kadagiti uken ti pannakaisinada iti inada ngem adda met dagiti pagdaksanna.
No saan a masigurado ti galad ti ina nga aso, padasen a paliiwen ti tigtignayna. No adda dagiti gundaway a dangran ti ina nga aso dagiti uken, nasaysayaat a mangikabil iti barikada iti nagbaetanda. Saan ngamin a nasayaat a naan-anay a pagsinaen dagiti uken iti inada ta agtungpal daytoy iti depression ti ina ket no dadduma, daytoy ti gapuna nga agpagunggan.
Nakaisigudan nga isaksakit ti ina nga aso dagiti uken mangrugi iti pannakaipasngayda. Agingga iti mabalin, saan koma a maisinsina dagiti uken iti inada.
Saan pay koma a masingsinga ti ina nga aso ken dagiti uken iti sumagmamano nga oras kalpasan ti pannakaipasngay dagiti uken. Iti kastoy, maikkan ti ina ken dagiti uken iti gundaway nga aginana.
No masinga ti ina, mabalin a masinga met ti pannakaparnuay ti gatas a kasapulan unay tapno mataraonan ken tapno mapabileg ti ti naturalesa dagiti uken.
Laglagipen nga iti umuna a sangapulo ket dua nga oras ti kangrunaan a panagsuso dagiti uken ken kalpasan ti dua agingga iti tallo wenno uppat nga oras.
Saan a makaipauneg dagiti uken iti solido a taraon agingga iti agarup a makabulan ket ti laeng panagsusoda ti kangrunaaan a paggapuan ti taraonda.
Mapaliiw no adda met laeng rummuar a gatas iti suso ti ina nga aso iti umuna nga 48 nga oras. Dagdagusen nga ikonsultar iti beterinario no awan rummuar a gatas manipud iti ina nga aso tapno maipaayan dagiti uken iti sabali a paggapuan ti gatas wenn taraon.
Kadawyan a nakiddit ti gatas dagiti agdadamo nga aganak nga aso ta saan pay laeng a naluktan wenno nairuam ti suso a mangparnuay iti gatas.
Saan ketdi a supusopan ti gatas ti ina ti aso iti ania man a gatas iti pagtaengan. Saan a nairanta a para aso ti gatas a para iti tao.—O