Ti Gasatmo Ita a Lawas
NASUERTE ni Direk Jason Paul Laxamana ta maaddan iti trabaho kadagiti tallo a kangrunaan a prodiuser iti pelikula iti pagilian— Star Cinema, Viva Films ken Regal Entertainment. Malaksid pay nga adda dagiti proyektona nga indie.
Iti pannakasursurat daytoy, nalpasen ni Direk JP ti sinuratna a mismo a pelikula a “So Connected” a pagbidaan da Jameson Blake ken Janella Salvador.
Segun ken ni Direk JP, isu ti nangpili ken ni Jameson para iti akemna iti pelikula. Malaksid nga umisu ti aktor iti papel, kuna ni Direk JP a kayatna a kanayon nga adda baro iti aramidenna a pelikula. Nadakamat ngamin nga inkonsiderar pay ni Elmo Magalona a loveteam ni Janella, a nagangayanna, saanna met laeng a pinili ta naidirehena idin da Elmo ken Janella.
* * * Nairuaren iti publiko dagiti nominado iti maangay a 66th FAMAS Awards Gabi ng Parangal inton Hunio 10, 2018 iti The Theater Solaire.
Iti umuna a gundaway, dagiti mangabak iti FAMAS ket pilien ti maysa nga independent jury a buklen dagiti movie practitioners, academicians ken critics nga idauluan ni Ricky Lee a premiado a mannurat ken scriptwriter.
Karaman kadagiti kategoria a mapadayawan ti Picture, Director, Actress, Actor, Supporting Actress, Supporting Actor, Original Screenplay, Adapted Screenplay, Cinematography, Editing, Production Design, Music, Original Song, Sound ken Special Effects. Iti daytoy a tawen, mapadayawan metten ti documentary ken short film. Adda met biang ti publiko iti pannakapili ti Audience Choice Awards for Picture, Actor ken Actress.
Maipalagip a nabangon idi 1952, maibilang ti FAMAS (Filipino Academy of Movie Arts and Sciences) a kalatakan a mangipapaay iti pammadayaw iti industria ti pelikula iti Filipinas. Iti edision daytoy iti 2018, kualipikado a mapadayawan dagiti pelikula a saan a nababbaba ngem maysa nga aldaw ti pannakaipabuyana kadagiti pagsinean iti 2017.
Ti met Megavision Integrated Resources Inc. ti prodiuser iti pannakitinnulong ti
Film Development Council of the Philippines, Victorino’s Restaurant, MAC Cosmetics, Aloysius Global, The Theatre at Solaire, Gardenia ken PAGCOR.—O