Idi Un-unana a Panawen
“Dad, I already know all those stuff. Someone is already running it for you in Las Vegas. Your current job, dad.... that’s what I want to know.” “Security consultant.” “Security consultant? What do you do?” “Tumultulongak kadagiti dadakkel a kompania iti sangalubongan a mangsalaknib iti negosioda. Agikapkapetak pay iti surveillance camera ken security systems. Iti kinaadu dagiti kompania iti Amerika nga addaan kadagiti sangsangana kadagiti sabsabali a pagilian, kasapulanda ti proteksion. Ket isursurok ida.” “Including how to fight?” “If they have to.” “Napeggad.” “Not for me. I just train them of what they do.” “Apay nga adda latta agpanggep a mangpatay kenka uray sadino ti yanmo, dad? Kasla nakaad-adu ti tao a mayat a matayka.” “Diak ammo, barok. Ngem siguro, nayon ti trabahok dayta.” “Dad, please, dikan agulbod.” Nagkuretret ti muging ni John. “Apay koma nga ulbodenka?” ”Adda kalkalubam?” “Ania koma ti kalubak?” Nagkatawa ni John iti kinaunton ti barona. Dinayawna ketdi ti kinasidap ti panagpaliiw daytoy.
“Diak ammo man. Ngem amangan no adda sinapataam... gapu iti trabahom... gapu ta maysaka a CIA...”
Naklaat ni John. Kellaat nga imprenona ti lugan sa impaigidna. “Ania ti sasawem?”
“Sorry, dad, but you drop your badge a few days ago. Pinidutko. Diak inggara a kinita. I’m sorry.”
Immanges iti nauneg ni John. “It’s okay. Ngem saan koma a rumbeng a naammuam daytoy, barok.”
“I’m sorry, dad. But I’m really proud of you. Nakaragragsakak ta CIA ti amak.”
Napaanges manen iti nauneg ni John. “Ita, dimo ibagbaga iti asino man daytoy a naammuam, uray ken ni grandmam. Delikado.” Nagtung-ed ni Jay-ar. “I promise, dad.” Agtartaray manen ti luganda ngem mariribukan pay laeng ni John iti naammuan ti anakna. Narigrigaten a salakniban ti anakna. “Dad, can I also be a CIA when I grow up?” Natitileng iti saludsod ti anakna. Kayatna nga ipaddak manen ti preno. Kayatna nga ibugkaw iti anakna ti kinapeggad daytoy a trabaho. Kayatna nga ipakpakaasi a saan a maikanatad daytoy a trabaho kenkuana. Kayatna a...
Immanges iti nauneg. Kasano nga ilawlawagna iti anakna no apay a nagbalin a kameng ti CIA? N AKALAWLAWAG a nakita ni Daniel ti pannakauklap ti bulong ti ridaw a napuersa a nakugtaran ken ti panagtupak daytoy ken ni Jerky. Ngem ad-adda a nasulek dagiti matana kadagiti tallo a lallaki a nakaiggem iti paltog. Dinagdagusna nga insuyo ti bagina iti datar sa giddato a kinalbitna ti gatilio ti paltogna nga impaturongna kadagiti lallaki. Napasag a dagus ti dua. Nakapaglinged ti maysa iti ridaw. Nagallin a naglinged iti sopa.
“Okey ka lang ba?” impukkaw ni Daniel. Ammo ni Jerky nga isu ti kasarsaritana. Kadagiti kakastoy a gundaway, pulos a saanda a dakamaten dagiti naganda para iti seguridadda. “Wen!” insungbat ni Jerky. Sinirip ni Daniel ti disso a nakapandagan ni Jerky. Iwalwalin daytoy ti bulong ti ridaw.
“I’ll cover you!” kinuna ni Daniel. Siniripna ti naglingedan ti lalaki. Dina makita. Timmakder. Nagturong iti yan ni Jerky. Imbagotna ti bulong ti ridaw ket nagkarayam ni Jerky tapno makaalut-ot iti pannakapandagna. Apagisu a makangngegda dagiti danapeg ti agtartaray nga umasideg iti yanda. Nagtarayda a nagturong iti likud. Awan pagnaanda. Napanda iti banio. Adda bassit a tawa dita. “Mano pay ti nabati a balam?” sinaludsod ni Daniel. “Sipupunno pay laeng ti magasin ti paltogko. Adda maysa a reserbak,” insungbat ni Jerky. “Sika?” “Adda pay walo.” “Asinoda ngata dagitoy?” “Imbaon siguro ni general ida. Nagpatingga siguron ti serbisiota kenkuana. Paipakninatan ta mabuteng a matiliwnata dagiti pannakabagi ti linteg. Mabuteng ta amangan no ibunannagta ti nangbilin kadata.” Naparasaw ni Jerky. Pagam-ammuan, nagkanalbuong. Linussok dagiti bala ti diding ti banio a naglemmenganda. Nakaparpardasda a nagpakleb. Saan nga agsarday ti panagpaltogda. Sumanengseng dagiti bala a lumsot iti diding ken lumasat iti ngatuen dagiti uloda. “Mataytan san,” kinuna ni Jerky. “Makalasatta laeng, isarunok a papatayen ni general.” Kellaat, nagtalna ti aglawlaw. Ngem saanda a timmakder. Sigurado a masirip dagiti kabusor ida kadagiti abut a nagdalanan ti bala iti diding no tumakderda. Nagtalinaedda a nakakul-ob. Tengtenglenda ti angesda. Agpammarangda a natayda. Ammoda, adda mangilukat iti ridaw ket saanda nga insina ti panagkitada ken nakapaturong dagiti paltogda dita.
Nakangngegda iti danapeg. Maysa wenno tallo a katao.
“Patay na kaya sila?” nakapuy ti timek ngem nangngegda. “Awanen agkutkuti. Sa imposible a saanda pay a natay ita. Namurumoranen iti bala dayta a diding.” “Sige, lukatak ti ridaw ken dakayo a dua ti pumaltog.” Nagkinnita da Daniel ken Jerky. Nakasagana dagiti paltogda. Nagpusipos ti seradura. In-inut, sa kellaat a nailukat ti ridaw. Ngem sakbay a nakapaltog dagiti tallo iti ruar, pinagsasarunon dagiti aggayyem a pinaltogan ida. Idi agulimek dagiti paltog, naulantaken dagiti tallo iti datar.
Timmakder da Daniel ken Jerky. Simmiripda iti ridaw. Ngem apaman a naitungraraw ni Daniel ti ulona, imkis a dagus ti kanalbuong. Nakaparpardas a nangilinged iti ulona. Kimmali ti bala iti hamba ti ridaw. “Duada pay,” kinuna ni Daniel. Taltallo ti nakitana itay sumirip. “Agsirkoka iti datar... I’ll cover you,” kinuna ni Jerky. “Deal,” kinuna ni Daniel. “At the count of three... Ready?” “One... two... and three!” Kellaat a nagsirko ni Daniel iti datar. Pimmaltog ni Jerky, ngem saanna a makita ti palpaltoganna. Apaman a nagdisso ni Daniel iti datar, nagpakleb a dagus. Nakitana ti nakapideg a maysa a lalaki. Pinuntiriana. Maysa, dua, tallo a bala. Natumba ti lalaki. Ngem nagparang ti maysa pay. Nakaiggem iti AR-15. Sipapardas ni Daniel a nangkalbit iti paltogna. Ngem littiik laeng ti nangngegna. Awen ti balana! Naparasaw.
Immisem ti lalaki. Impaturong daytoy ti AR-15 iti ulo ni Daniel. Nagarigenggen ni Daniel. Nagkidem. Kanibusanannan. Tallo a bala ti gimluong. Adda nanabtuog. Namulagat ni Daniel. Ti lalaki a nangipaturong kenkuana ti AR-15 a naudatal iti suelo ti nakitana. Ken ti umas-asuk a bunganga ti paltog ni Jerky. Nagyaman ni Daniel. Nangngegda ti umas-asideg a wangwang. Masdaaw koma dagiti dua iti kinaalisto ita dagiti pannakabagi ti linteg nga agresponde ngem heneral ti kabusorda, mabalin a mapasamak dagiti saan a gagangay a mapaspasamak.
Inarikumkomda dagiti gargaretda, inkabilda iti backbackda ket nagdardarasdan a rimmuar iti hotel. Nakaad-adu dagiti mangbuybuya kadakuada.
N AKAUN-UNEG ti panangsusop ni Gen. Miguel ti tabakona ngem dagiti dadakkel nga akasia a naipaunor iti kalsada ti nakaiturongan ti imatangna. Agtaktakder iti batog ti sarming a tawa iti dakkel nga opisinana. Aggitebgiteb ti barukongna. Di makatalna. Agpusipos sa manen taliawenna ti selpon a nakaparabaw iti lamisaanna. Ur-urayenna ti awag dagiti special ops-na.
Agtalek iti kabaelan dagitoy ngem dina latta maliklikan ti agdanag. Ammona ti kinasikap ken kinalaing ni Daniel a kas kameng ti PNP-SAF. Maysa kadagiti katuturedan. Naipasungalngalen kadagiti kameng ti MNLF ken MILF. Adun ti kinettelna ti biagna a kalaban ti turay. Ngem adda tangtangken ti ulona. Saan unay a mamatpati kadagiti superior officer-na. Isu a naikkat iti serbisio.
Innalana a badigardna. Ken para ipakni kadagiti kabusorna. Uray naminsan laeng, di pay nagkibaltang ni Daniel. Isu a natalged ti riknana no isu ti kadkaduana. Ngem napagtinggan dayta a kinatalged gapu iti pannakaiparang ti ladawan ni Daniel iti telebision ta isu ti mapapati a maysa kadagiti nangbomba kadagiti agralrali iti Luneta. Nagbalinen a dadagsenna. Ket sakbay a matiliw dagiti pannakabagi ti linteg, nasken a maipakni. Masayangan. Ngem masapul a matay.
Liningayna ti selpon idi agkiriring daytoy. Nakaparpardas a nagtaray a nanggammat iti selpon. “Report,” kinunana. Magagaran. “Bad news, Boss Sir...” naliday ken mabutbuteng ti timek ti umaw-awag.