(Maika-10 a Paset)
“P ANGSALAKNIBMI laeng iti bagimi dagidiay a paltog, Mr. President,” inulit ni Adam Hutchison, “awan sabali a nakairantaanda.” Nagtalinaed pay bassit ti imatang ti Presidente iti rupa ti baro nga ambassador sa inakkalna. “Maawatak, Mr. Ambassador, ngem, please, saanyon nga uliten pay. As a guest to our country, we are responsible for your security. Should you need security detail, we will provide you with my people. As tense as the situation in the street, I don’t want to create the impression that we are in a miltary rule.”
“We will comply, Mr. President. You have my word and the honor of the United States of America.”
“And while we are under siege by the demonstrators, I suggest you, for your protection, to stay within the confine of the US Embassy and to your own residences.”
“Mr. President...” adda panagprotesta iti timek ni Adam Hutchison.
“Temporario laeng, Mr. Ambassador... agingga a maurnos ken mariendaanmi daytoy a riribuk. Ket namnamaenmi ti naan-anay a pannakitunnulong wenno kooperasionyo.” INALIAW ni Daniel ni Jerky. Nakataltalna daytoy a kasla awan ti pakariribukanna idinto nga isuna, madanagan unay para iti pamiliana. Saanna a masalakniban ida no adda mangdangran kadakuada ta nagpupokda iti daytoy nakabasbassit a kuarto a yanda ita. Naipakita itay ti ladawanda iti telebision ket agduaduada no mailingedda pay ti kinaasinoda. Saan a nalawag ti pannakaala ti rupada ngem dagiti tattao a makaam-ammo kadakuada, awan duadua a malasinda ida nangruna ta nangiputongen ti Presidente iti lima a milion a pisos a gunggona iti asino man a makaitudo ti yanda. Agpeggad ti biagda. Sa ita, saanda a mapasungbat ti boss-da a heneral. Kayatda a maammuan no ania ti sumaruno nga addangda. A, ngem sipsiputan la ketdi idan dagiti pannakabagi ti linteg.
Pinidutna ti throw-away a selpon. Nagdayal. Nagkiriring iti naminlima sa nagturong iti voicemail. “Di pay simmungbat?” sinaludsod ni Jerky. “Awan. Amangan no tinallikudannata payen.” Immanges iti nauneg ni Daniel. “Madanaganak... amangan no iramramanda ti pamiliak.”
“No ngamin inta lattan alaen ti kuarta a naibayad kadata? Ammota met ti yanna... Ken adda kadata ti tulbek ti nakaidulinanna. Kalpasanna, intan idiay probinsia.” “Saan pay a nalpas ti kontrata.” “Amangan no nagdanag metten ni general iti pannakaipalkat dagiti ladawanta iti telebision ket baybay-annatan. Wenno intedna pay ket ngatan dagiti naganta kadagiti pannakabagi ti linteg.”
“Saanna nga aramiden dayta,” insupiat ni Daniel. “Isu ti adadda a maisagmak no ipulongnata. Adda kaniak dagiti amin a pammaneknek nga isu ti akin-utek iti daytoy.”
Bimmangon ni Jerky. “No blackmail-enta ngata ti animal?” kinunana.
“Ad-addan, a, nga awan ti paglemmenganta. Ken sakbay a T
masapulandata dagiti polis, napaipakninatan. Ken asino ti mamati kadata no kas pagarigan? Heneral ti panggepmo a labanan.”
Nagkiriring ti selpon ni Daniel. Nakaparpardas ni Daniel a nangpidut. “Nagkibaltangkayo!” makapungtot ti timek ti heneral. “Saankay’ a nagannad a pulos.” “Nakurang ti instruksionmo, sir.” Nagrasaw ti heneral iti nakapigpigsa ket uray la a napleng ni Daniel. “Dakayo ti professional hitman... Ammoyo koma ti agannad!”
“Saandakamto a malasin, sir. Saan a nagparang dagiti rupami.”
“The PNP has the technology to uncover your identity...”
Saan a nakasungbat a dagus ni Daniel. “Aglemmengkami, sir...” nakarawana a kinuna idi agangay. Timmaliaw iti ridaw ta adda nagtoktok. “Room service...” timek manipud iti ridaw. Nagkinnita dagiti aggayyem. Awan inorderda. “Okay, take care of that room service,” kinuna ti heneral ket naputolen ti linia.
Nagmalanga ni Daniel. Apay nga ammo ti heneral ti room service? Nagtibbayo. Ginammatanna ti paltogna a nakaparabaw iti night stand.
Nakasagana mettten ni Jerky. Iggemna ti paltogna, nagin-inayad a nagturong iti ridaw. Sumirip koma ngem apagisu a manalbaag iti kellaat a pannakailukat ti ridaw ket nabaliktad. Tallo a nagtagiarmas ti simrek. K AS ken ni Jay-ar, nakaul-ulimek ni John iti dalanda nga agawid. Adda latta iti panunotna ti nanggandat a mangpapatay kadakuada nga agama. Uray kettelenna koma ti biag daytoy no saan nga agpudno. Kayatna ti mangibati pakdaar iti asino man a mangpangpanggep a mangisikat kadakuada a saan a mabuteng iti no asino man. Ngem adda ni Jay-ar. Saanna a kayat a makasaksi manen ti anakna iti pammapatay. Umanayen daydi napasamak iti daydi naminsan a panaganupda.
Dina met mapunas iti panunotna ti inaramid ti barona. Naituredna ngata koma ti anakna a kinalbit ti paltogna?
Saan nga ammo ti anakna ti pudno a trabahona. Kayatna nga agtalinaed a kasta. Saanna a kayat nga agbalin ni Jay-ar a kas kenkuana. “Dad?” ni Jay-ar ti nangbeltak iti kinaulimekda. Tinaliaw ni John ni Jay-ar iti apagapaman sa insublina met laeng a dagus ti panagkitana iti sango ta agmanmaneho. “Yes, son...” “Saanmo pay a sinungbatan ti saludsodko...” Nagmuregreg ni John. “Saludsod nga?” “Salsaludsodek itay no ania a talaga ti trabahom.” “Saanko kadi a nasungbatan itay?” “Dad, aginkukunaka manen. Adda ilemlemmengmo kaniak, ala?” kinuna ti ubing.
Napanganga ni John. Managpaliiw payen ti anakna. “Ania koma ti ilimedko? I was a Marine, remember?” “I know that part, dad... but, then you got out...” “Yap... and then took over your grandpa’s commercial cleaning business.”