Kasano nga Irugim ti Aldawmo?

Basaentayo ti Dagiti Salmo 57:01-11

Agriingka, O kararuak! Agriingkayo, salterio ken arpak ket riingek ti bannawag!—Dagiti Salmo 57:8

NAITED kadagiti nakisalisal iti maysa a pabuya iti telebision daytoy a saludsod: “Kasano nga irugi dagiti tattao ti aldawda?” Babaen ti panangarisit iti sungbat ti kaaduan, ti rimmuar a numero uno ket “babaen ti kararag.”

Kastaak met, kayatko nga irugi ti aldawko babaen ti kararag. Sakbay ti panagdiram-osko, panagkartsa, panamigat, panagbuya iti damag iti telebision, ken panagsaganak iti trabahuek iti entero nga aldaw, kayatko ti mangited iti tiempo a pannakikadua iti Apo.

Ammok a “saantayo nga agbiag babaen ti taraon laeng, ngem manipud tunggal sao nga aggapu iti Dios” (Mateo 4:4), isu a tunggal bigat agbasaak iti Nasantuan a Surat. Ikararagko ti panagbiagko ken dagiti kasapulak. Ikararagko dagiti sabsabali babaen ti panangiturong ti Espiritu Santo. Masansan a yebkasko ti Kararag ti Apo. Kabayatan ti panagkarkararagko, maipalagip kaniak a ti Dios ti nailangitan nga Amak. Dumawatak iti sustento, pammakawan, ken pannakaisalakan. Nangnangruna nga ikararagko a maidaydayaw koma ti Dios. Matulongannak a mangisentro iti pammati iti Dios ti entero nga aldaw no irugik ti aldawko iti daytoy a wagas.

Kararag: Amami nga adda sadi langit, madaydayaw koma ti naganmo. Umay koma ti pagariam, maaramid koma ti pagayatam, no kasano idiay langit, kasta met koma ditoy daga. Itdem kadakami ti taraonmi iti inaldaw. Pakawanem dagiti basbasolmi, a kas met iti pammakawanmi kadagiti nakabasol kadakami. Dinakam’ yeg iti pannakasulisog no di ket isalakannakami iti dakes: Ta kukuam ti pagarian, ti pannakabalin, ken ti gloria nga agnanayon. Amen. (Mateo 6:913)

Kapanunotan: Ita nga aldaw, irugik ti aldawko babaen ti pannakikaduak ken ni Apo Dios.

Ikararagan: Maysa nga agsursuro nga agkararag.