Sursuruan Dagiti Ubbing Kadagiti Trabaho iti Balay
SAAN koma nga agbalin a konsintidor dagiti nagannak babaen ti dida panangited iti trabaho a kabaelan agiti annakda. No dadduma, kuna dagiti nagannak a kaasi met dagiti annakda a maikkan iti trabaho ta naganusda pay laeng.
Saan koma a kastoy ti galad dagiti nagannak kadagiti annakda. Rumbeng laeng a takuatenda ti kabaelan dagiti annakda tapno masursuruan dagiti ubbing nga agbalin a responsable. Bassit laeng a banag ti panangisuro kadagiti ubbing a mangurnos kadagiti gamigamda iti siled a pagturogan wenno iti panangisaganada iti lamisaan a panganan.
Uray sangkabassit a banag a kas iti panangikabil ti maysa nga ubing kadagiti nanganan iti lababo, addan maipaayna a tulong iti maysa nga agtagibalay a no dadduma, saanna pay ketdin nga ammo ti irugina kadagiti nakaad-adu a trabahona.
Malaksid iti daytoy, masursuro met ti ubing ti kinapateg ti responsibilidad ken ti panagtalekna iti bukodna a kabaelan.
Saanen a narigat nga ikkan iti responsibilidad ti maysa nga ubing no madanonna ti maikalima a tawenna a kas iti panangkupinna iti ulesna no makariing wenno panangikabilna iti nagsukatannna iti pagikabilan iti mureng.
No saan nga ikkan ti maysa nga ubing iti responsibilidadna, mabalin a masdaaw daytoy no adda ibilin nga aramidenna no kasta nga adda ikamkamakam nga aramiden wenno agkurang iti oras gapu kadagiti sabsabali pay nga adu a pakakumikoman.
Adda dagiti wagas a pangallukoy kadagiti ubbing a tumulong nga agiwakas kadagiti aramid iti pagtaengan a kas iti panangipalagip kadakuada kadagiti maisursuro iti pagadalan.
Mabalin pay a makaparagsak nga aramid ti ania man nga itulong dagiti ubbing kadagiti aramid iti pagtaengan a kas koma iti panangikankantada iti maibilin nga aramidenda a kas kadagiti maisursuro kadagiti klaseda.
Mabalin pay a bingaybingayen dagiti aramid kadagiti dadduma a kameng ti pamilia ngem ibilin laeng dagiti kabaelanda nga ileppas.
Mabalin met nga ikkan iti gunggona dagiti ubbing a maikaileppas a dagus kadagiti aramidda. Annadan laeng ti panangaramat iti kuarta ta addanton rigrigatna ti mangbaon kadakuada no awan ti maited a tangdanda.
No ngamin ibilbilang dagiti ubbing a pasuksok ti maited a kuarta, marigatanton ti mangbaon kadakuada no awan ti maited a gunggona wenno subad ti panagtrabahoda.—O