Panagsabong ti Kapasanglay

Agbibitin a panniki dagiti bunga ti kapasanglay Imetda ti aliaw manipud iti sipnget a taeng dagitoy nga ayup Ballaag: adda bisin kadagiti dawa ti pagay Mabalin a di napagustuan ni Kabunian; impaidamna dagiti ulep.

Nakaiparsuaan man ti panagkalikagum iti gin-awa, adda pagpatinggaan Ti parabur ti daga manipud inaladan dagiti didiosen ti talon Addada agamang a mapempenan laeng iti buribor ken pungtot Karaman dagiti troso, inyanud ti layus dagiti biag ken sanikua.

Ababa ti anus dagiti saan a nagramut ti panamatida iti daga Maawis iti rimat ti ganggannaet a pirak; paggaak ti siudad Dagiti rengngat ti sentido ken kinelleng, taeng dagiti karasaen Kasalisal dagiti anay dagiti ubbing iti panangkittibda iti away.

Nagrambak kadi dagiti sabong ti bagbag kadagiti ulo a naputol? Awan ti makasierto. Ta kagiddan ti panagkirriit dagiti karayan, Dan-aw ken bubon, agsabong met ti kapasanglay bayat a balbag ti langit Adda mangtaytaya iti linnaaw ti bannawag, adda agpaspasaringit iti bin-i.

Kuna dagiti nataengan, dagiti mangga ken tsiko a di agbunga Kigtoten, tagbatagbaten dagiti puon ken sangada Dagiti nagtalek iti daga, matagtagainepda dagiti sungbat ti burburtia A masansan, ipalnaad dagiti ulep; yarasaas ti amian ken abagat.

Mamatikami latta nga agsubli ti panamati iti nakaparsuaan a kananakem Ket di agduadua nga iti gukayab, kadkadua laeng ti daga ti adda sadiay.