Bungkol
Makais-isem dagiti namutittit a sinublan Nagbatayda kadagiti agtutungtong a bato. Nakalanlanit dagiti langdet A tinukod ti tadem ti kampit-buneng A pinagiwa, pinagtupek Dagiti kakaarruba ti agpabungkol. Nakamattider dagiti bulo-bayog ti palapala Iti kalawaan a paraangan A mangur-uray a pangdanggayan Dagiti naglantip a puso iti “Faithful Love.” Agsasalip dagiti kalakian A mangsiket kadagiti kabayan Tapno agindayonda kadagiti samiweng Nga agindurog iti salonan. Nakangayngayed ti sinamar ti agsapa A makiinnisem kadagiti di pay nalpaan a sinublan Ken di pay nabelnasan a langdet. --RONNIE E. AGUINALDO