Siled ti Kararag
Basaentayo ti Deuteronomio 29:2-6,29
“Adda dagiti palimed a saan nga impakaammo ti Apo a Diostayo. Ngem kukuatayo iti agnanayon, datayo ken dagiti kaputotantayo, dagiti naipakaammo a palimed tapno tungpalentayo dagiti amin nga alagaden daytoy a linteg.”—Deuteronomio 29:29
IDI simrekkak iti kolehio, adu ti naduktalak a baro a kapanunotan. Kas agtutubo a natalged a Kristiano, narigatanak a nangidilig kadagiti baro a bambanag nga ad-adalek, kangrunaan ti pilosopia ken relihion, ken dagiti simple a doktrina ken pagsasao a naisuro kaniak iti iglesia. Idi dinamagko ti pastormi maipanggep iti pakarigatak, imbalakadna a lisiak a panunoten dagidiay a bambanag.
Nakipagtaeng ni apongko a baket kadakami, ket iti maysa nga aldaw idi nagawidak iti sembreak, bimmisita ti pastorna. Kinomusta ni Pastor ti panagadalko. “Nasayaat met,” kinunak. Ngem siguro adda nadlawna iti timekko ket inrugina ti nagpalutpot agingga a napan ti saritaanmi kadagiti panagduaduak ken pagrigrigatak. Kamaudiananna, imbagana kaniak ti nailanad iti Deuteronomio 29:29.
Natignayak iti daytoy a bersikulo, ket kasla bagbagaannak a saanak a mababalaw no diak ammo ti amin a banag. Adda dagiti “nalimed a bambanag,” bambanag nga agtalinaed a kankanayon a misterio. Nasayaat ti agsaludsod, mangduktal iti baro a kapanunotan, mangpalawa iti pannakaammo agingga iti kabaelan. Ngem adda dagiti saludsod a saan a maigibus a masungbatan. Uray no kasano ti kinalaingtayo wenno kinangato ti adaltayo, adda pagpatinggaan ti kinasiribtayo. Iti dayta a kanito, mapagtalkantayo ti pammati, ayat, ken namnama a mangtarabay kadatayo iti dalan a masakbayan.
Kararag:
Patgenmi a Dios, yetnagmo kadi ti kinasiribmo no takuatenmi dagiti misterio ti pinarsuam a lubong ken tulongannakami nga agbalin a natalek iti panangsurotmi kenka. Amen.
Kapanunotan:
Ti kinadaeg ti Dios saan a magtengan babaen ti kinasirib ken pannakaawat ti tao.
Ikararagan:
Dagiti estudiante a Kristiano.