Ti Tarakenmo ken Sika
TI nalabes a kinalamiis dagiti kayan-anak nga uken wenno ti kinababa ti temperatura ti maysa kadagiti kangrunaan a parikut kadagiti umuna nga oras a pannakaipasngayda. Nasken a paliiwen amin dagiti nagduduma a parikut ta kritikal dagitoy iti panagtultuloy a panagbiag dagiti kayanak nga uken.
Mairaman pay kadagiti parikut dagiti kayanak nga uken ti abnormalidad. Adu dagiti mayan-anak nga uken ti addaan iti abnormalidad a no dadduma ket mabalin met a maipamuspusan tapno agbiag dagiti uken.
Napateg ti panangpaliiw kadagiti sintoma ti ania man nga anannayen wenno dadduma pay a parikut kadagiti kayanak nga uken tapno madagdagus a maikonsultar iti beterinario.
Mairaman pay kadagiti parikut ti panangyadayo ti ina iti bagina kadagiti uken. Adda met dagiti gundaway nga umadayo wenno saan nga umasideg ti uken iti inana.
Mapaliiw pay kadagiti umuna nga oras ti pannakaipasngay dagiti uken ti panagsangitsangit wenno panagan-anang-ang, panagsaruasarua ken panagtakkida.
Mapaliiw ti panagduduma ti tigtignay dagiti kaippasngay nga uken a kas iti kinasaranta wenno panaglaladutda. Dagitoy ti pagbasaran no adda parikut.
No saan nga agsuso ti maysa nga uken a kas kadagiti kakabsatna, wenno nakapsut ti panagkunnotna iti suso ti ina, mabalin a nakapsut wenno adda parikut ti uken. Padasen a yasideg ti ngiwat ti uken iti suso ti ina tapno mapaliiw no kunnotenna ti suso. No dina kunnoten ti suso, padasen a pasusuen iti pormulasion nga ibalakad ti beterinario.
Adda pay dagiti uken nga umasul wenno lumabaga ti marisda. Mabalin a maigapu daytoy iti di maitutop a temperatura iti nagpasngayan ti ina nga aso a mabalin a nalabes ti kinapudot wenno kinalamiisna.
Pagtalinaeden ngarud a nadalus, addaan iti maitutop a temperatura ken suroten dagiti rumbeng nga aramiden tapno agtalinaed a nasalun-at dagiti uken ken ti ina nga aso a nagpasngay.—O