Idi Un-unana a Panawen
IDI un-unana a panawen, adda aggayyem nga am-ammo ti amin ti kinapudnoda iti tunggal maysa. Agingga iti dimteng ti panawen a ti pagarianda, rinebbek ti maysa a dakdakkel a pagarian ket ti maysa kadagitoy nga aggayyem, natiliw ken naibalud ken naikeddeng a mabitay.
Iti aldaw a pannakabitayna, dimmatag ti lalaki iti ari ket kinunana, “Pangngaasim, Apo Ari, ta sakbay kadi a papatayendak, agawidak koma pay biit idiay lugarmi agsipud ta adu ti pautangko. Awan ti listaak ket saan nga ammo ni baketko no asino dagiti nakautang kaniak. Inton masingirko dagiti pautangko ken maitedko a kas pagbiag ti asawak ken dagiti annakmi, agsubliakto ditoy tapno bitayendak.”
Imbaga pay ti lalaki ti aldaw a panagsublina iti sanguanan ti ari tapno maituloy ti pannakabitayna.
“Kasano a masiguradok nga agsublika iti aldaw a kinunam?” sinaludsod ti ari.
“Iti ruar daytoy a palasio, napateg nga ari,” kinuna ti lalaki, “adda dita ti gayyemko a sisasagana mangisuno kaniak. No diakto agsubli iti aldaw nga imbagak kadakayo, bitayenyonto ti gayyemko.”
Pinaayaban ngarud ti ari ti gayyem ti lalaki ket sinaludsodna, “Pudno kadi ti kuna ‘toy gayyemmo a sisasaganaka a mabitay no saan nga agsubli iti aldaw nga imbagana?” “Wen, napateg nga ari,” kinuna met ti lalaki. Nasdaaw ti ari iti napnuan talek a panagsao daytoy a lalaki ket gapu ta kayatna a maammuan ti sumaruno a mapasamak, pinatganna ti kiddaw ti mabitay koma a lalaki tapno mapan agsingir kadagiti pautangna.
Agingga iti dimteng ti aldaw a naituding a panagsubli ti mabitay a lalaki. Ngem awan a nagparang daytoy. Naipan ngarud ti gayyem daytoy iti pagbitayan ket idi maipungsay koman ti ulona, isu met ti panagkakaribuso dagiti soldado. Addan ti gayyem ti lalaki!
Daras a napan daytoy iti yan ti gayyemna tapno yadayona iti pagbitayan. Ngem saan a namki ti gayyemna. “Bay-am a siak ti mabitay!” kinuna daytoy. “Agsublika iti asawa ken kadagiti annakmo! Masapuldaka!”
“Sika ti agawid! Masapulnaka ni inangmo! Baketen ket masapulna ita ti pannaranaymo!” indawat met ti sangsangpet.
Binuybuya ti ari dagitoy nga aggayyem. Napaneknekanna, babaen dagiti bukodna a mata ken lapayag, no kasano ti kinapudno dagitoy iti tunggal maysa. Agingga iti imbilinna a maisardeng ti panagbitay. Impakaammona met a pinakawannan ti lalaki a nakedngan idi pay a mabitay. Malaksid iti daytoy, sinagutanna dagiti aggayyem iti sagsangakadusda a pirak.
“Kangrunaanna,” kinuna ti ari, “kiddawek koma kadakayo nga ibilangdak koma met a gayyemyo.”
Banag a dagus a pinatgan dagiti aggayyem.—O