Ania, Aya, ti Maipaay ti Isports Kadagiti Ubbing?
ADDA dagiti nagannak a mangipagpagel iti pannakipartisipar dagiti annakda kadagiti kompetision a mainaig iti isports aglalo la ket ngaruden no ammoda a maabakto met laeng dagitoy. Kabaliktadda met dagiti ubbing a mangipingpinget a makipasetda kadagiti kompetision iti isports iti laksid ti masansan a pannakaabakda.
Rumbeng laeng a raemen dagiti ubbing a maabak la ngaruden, ipingetda pay laeng ti makipartisipar kadagiti kompetision iti isports. Nalawa ti kapanunotan dagiti kakastoy nga ubbing. Ammoda ti realidad nga iti biag, adda panangabak ken adda pannakaabak. Mabalin pay a maamiris dagiti kakastoy nga ubbing nga addanto met laeng panawen a mangabak ken agballigida iti tay-ak ti isports.
No utoben a naimbag, agpayso unay a mangipaay ti pannakisalip iti isports iti pammaregta tapno magun-od ti kayat a ragpaten. Parnuayenna ti determinasion, kinamanagparnuay ken anus tapno masaranget dagiti karit. No saan nga iginggina ti panagbannog ken positibo ti panangsaripatpat kadagiti panggep, agtungpal daytoy iti adadu pay a gundaway a panagballigi.
Aglaplapusanan ti biag kadagiti saan a mabilbilang a pasamak ti panagballigi ken pannakapaay. Masapul laeng a masursuruan dagiti ubbing tapno masarangetda dagiti pannakapaay ken panagtalekda iti bukodda a kabaelan. Mapaayda man iti adu a gundaway, rumbeng laeng a panunotenda a maluktanto met laeng ti ridaw ti panangabakda. Ket daytoy a kinapudno, maipasagepsep kadakuada iti pannakipartisiparda kadagiti kompetision iti isports.
Wen, adu dagiti adal nga ipaay ti kompetision a pakairamanan ti isports. Tignayenna ti maysa a tao tapno aramatenna ti amin a kabaelanna a no dadduma, iti panagkunana, ket saanna a kabaelan.
Ti regget a mangabak wenno agballigi ti mangiduron iti maysa a tao tapno ipakatna amin dagiti kabaelanna a mangabak.
Mapaneknekantayo kadagiti kompetision iti isports a mabukel ti panagtalek dagiti ubbing iti bukodda a bagi nga imetda agingga iti panagadu ti tawenda. Maipaganetget kadakuada ti kaipapanan ti pangbannog, disiplina, panagtitinnulong, ken panangibaklay iti pagrebbengan iti panangdupirda kadagiti tiped ti karit iti pangballigi.
Napateg unay dagiti adal a maadaw iti isports ket saan koma nga agbuteng dagiti nagannak a mangibaon kadagiti annakda a makipartisipar uray no kankanayon wenno masansan a maabak dagitoy ta masuruan met dagiti ubbing no kasano nga akuenda ti pannakaabak ken masuruanda a mangamiris no apay a naabakda; iti kasta, agpanunotda met iti wagas no kasano nga agballigida.
Iti sabali a pannao, ti kompetision iti isports, kas met laeng iti kompetision iti ruar ti isports. Ket napintas ti tay-ak ti isports a pagsursuruan ti ubing a mangsango kadagiti adu a parikut iti biag.—O