Panangimaton iti Pagtaengan
ADU dagiti maipatpatigmaan nga aramidentayo tapno makainuttayo iti singir iti elektrisidad. Ngem uray no kasta, adda pay dagiti dadduma a rumbeng nga aramidentayo a mabalin a pakasalimetmetantayo iti saan a nakurkurang ngem Ph15,000 iti bayad ti koriente iti uneg ti makatawen agbatay iti kadakkel ti balay ken dadduma pay a situasion.
No adda la ketdi pannakabalinna, agaramat iti natural a lawag. Adu ti mangikabil iti tawa iti paset ti balay a sumango iti abagatan ta daytoy ti kangrunaan a paggapuan ti natural a a lawag a saan a sumarang iti init.
Ad-adda pay a makainut iti koriente no table lamps, track lighting wenno agaramat kadagiti silaw a deretso a nakaturong iti ar-aramiden. Maitutop daytoy iti panagbasa ken kadagiti aramid iti kosina. Ad-adu ti magastar a koriente no agaramat iti silaw nga aggapu iti bobeda.
Ibilin kadagiti ubbing nga irikepda ti gripo kabayatan ti panangsabonda kadagiti imada no agbuggoda. Kasta met no agsepilioda.
Lapsutem dagiti nakasaksak nga eletroniko a gamigam no saan nga ar-aramaten. Adda pay laeng magastar nga enerhia no nakasaksak dagiti elektroniko a gamigam uray payen naka-off dagitoy.
Ad-adu pay ti enerhia a mabusbos ti desktop computer. Nasaysayaat no agaramat iti laptop.
Kitaen pay a saan a tipden dagiti kortina ti iseserrek ti angin kadagiti tawa. Nasken pay a malingedan ti iseserrek ti init iti malem iti pagtaengan.
Nasken pay a full load ti washing machine no aglaba. Nagastar ti koriente ti saggabassit a panaglaba iti washing machine. Makainut pay no ibilag wenno pamagaan iti kainitan ti kawes a linabaan imbes a ti dryer ti aramaten.
Pagtalinaeden ti maitutop a temperatura ti repriheradora. Mabalin metten no 2°C ken 3°C ti kalamiis ti ref ken -18°C ti freezer.
Iddepen pay dagiti saan a masapul a silaw. Agusar pay iti microwave oven a saan ket nga ordinario nga oven.—O