Ti Gasatmo Ita a Lawas
GEMINI (Mayo 21- Hunio 20). Ania man ti maaramidam ita, agsubli kenka. Ti naannad nga addang ti mangpaasideg iti suerte kenka. Napintas a tiempo a panangpatibker iti pundasion ti arapaapmo. Nagasat a numero: 1, 4, 9.
CANCER (Hunio 21- Hulio 20). Agpasaklot ita kenka dagiti parabur. Manamnama met a makasarakka iti trabaho a mabalin a mangipaay kenka iti nawadwad a pirak. Kabaelam met nga aturen ti ania man a mapasamak a riro. Nagasat a numero: 3, 6, 7.
LEO (Hulio 21- Agosto 20). As-asideg ti balligi no nalag-an ti panunotmo. Nasayaat a yuman kadagiti kameng ti pamilia dagiti plano nangruna ket pakaseknan daytoy ti sibubukel a kaamaan. Maysa a nasinged a gayyem ti mangidateng kenka iti yamanem. Nagasat a numero: 1, 5, 8.
VIRGO (Agosto 21- Septiembre 22). Ad-adu dagiti yamanen ngem dagiti mangipaay iti buong ti ulo. Mabalin a lumangtoka ita ket saan a nakakaskasdaaw nga adda mayat a mangpaltong kenka. Ipapanmo lattan a pangparukbos daytoy kenka. Nasayaat met nga adda latta sensilio a karkaratikiten iti bolsa. Nagasat a numero: 2, 6, 9.
LIBRA (Septiembre 23- Oktubre 22). Mabalin nga umagpang ti propesionmo ita. Adda matulongam ita a dakkel ti akemna iti suertem iti masanguanan. Maysa a sorpresa a mainaig iti puso ti sumangbay kenka ita a lawas. Nagasat a numero: 1, 4, 7.
SCORPIO (Oktubre 23- Nobiembre 22). Dagiti ipagarup a paglinglingayan laeng ti mangipaay iti yamanem ita. Ti met kinamanagpakatawam ti mangitunda iti suerte iti sarusarmo. Maysa a kameng ti pamilia ti maidalanmo iti kinaimbag. Nagasat a numero: 2, 5, 8.
SAGITTARIUS (Nobiembre 23- Disiembre 20). Yintek ti imatang iti maysa a pagnaaran. Siguraduen ketdi a kadagiti adda nga oportunidad, daytoy ti kadakkelan ti maipaay kenka. Adda subad ti panagyaman iti gayyem a nakaipaay kenka iti grasia. Nagasat a numero: 3, 4, 9.
CAPRICORN (Disiembre 21- Enero 19). Maysa a tao ti makasapul iti balakadmo. Agpanunotka a naimbag sakbay nga ungapen ti ngiwatmo ta uray sika, kasapulam met ti kapanunotan ti sabali ita aglalo iti pakaseknan ti rantam nga iwayat a proyekto. Nagasat ti ania man nga irugim iti bigat. Nagasat a numero: 1, 6, 8.
AQUARIUS (Enero 20- Pebrero 19). As-asideg kenka ti gasat no positibo ti panagpampanunot. Naidumduma ti enerhia ket maibalakad ti panagiwayat iti maysa a panguartaan nga adu ti mairanud. Liklikan ketdi ti ania man a sugal ta awan ti suertem ita iti daytoy a benneg. Nagasat a numero: 2, 4, 9.
PISCES (Pebrero 20- Marso 20). Nasken a makaaramidka iti nakallalagip ita no kayatmo nga agmaris dagiti masungad nga aldawmo. Agbayag kenka ti koronam no ita a maragpatmo ti ar-arapaapem. Nasaysayaat a sika ti agay-aywan ngem ti maayaywanan. Nagasat a numero: 1, 5, 7.
ARIES (Marso 21- Abril 20). Napartaak ti yaay ti gasat ita. Masapul ketdi ti kinaalibtak ta adda laeng a mangtiemtiempo ti demalas. Adu ketdi ti nakasagana a tumulong kenka. Ngem nasaysayata latta a kontroladom ti gasatmo. Siguraduen a natalged ti salun-at sakbay a sarakusoken ti natuok a trabaho. Nagasat a numero: 3, 6, 8.
TAURUS (Abril 21- Mayo 20). Makatulong ti panangsarabom iti isem ti tunggal aldaw tapno maartapam ti gasat a dimteng itay lawasna. Dagiti gagayyemmo ti kangrunaan nga ubbog ti ragsak ken tarabay. Usaren ti kinalaing a makisarita tapno maawis ti sabali nga agtalek kenka ken kadagiti gannuatmo. Nagasat a numero: 2, 5, 9.