Awan Karbengan Dagiti Annak iti Daga Daydi Tatangda?

SALUDSOD:

Apo Hues, kasano kadi ti bingay kadagiti daga daydi nagawan nga amami? Adda tawid daydi amami kadagiti dadakkelna, ngem gapu iti kaawan ti kuarta, dina nai-transfer wenno naipapel iti naganna dagidiay a tawidna. Uppatkami nga annakna; ket ‘tay bingaymi iti maysa a kabsatko, kunana nga ipapelmi isu a nagpaaramidkami iti deed of adjudication ket ditoy, nagpirma ‘toy kabsat ni amami sa maysa a kaanakanna a kas testigo nga intednan daydiay talon a tawidmi. Ti pagdaksanna, Apo Hues, adda susikmi nga agiina; ibaga metten ni nanangmi a dakami nga annak, awan karbenganmi kadagiti daga. Agpayso kadi daytoy, Apo Hues?—Rao Ramos ti Cagayan

SUNGBAT:

No matay ti ama nga akinkukua iti daga, pagbibingayan ti asawana ken dagiti annakda. Ti asawa a sibibiag, kagudua; dagiti uppat nga annak, ‘diay met kagudua ti bingayda. Ket gapu ta uppatkayo nga agkakabsat, pagbibingayanyo nga uppat dayta kagudua.

Ti inayo a sibibiag, saan a mabalin nga ibagana nga awan tawidyo ta segun iti linteg, addaankayo iti tawid. No kayatyon nga alaen ti parteyo a kas agtawid iti daydi nagawan nga amayo, mapankayo nga umuna sadiay Barangay Lupon ta idarumyo ni inangyo. Ket no dikay agkikinnaawatan sadiay ta ipapilit ni inangyo a bukodna laeng ti daga ni amayo, mangyulikayo iti darum a panagbibingay wenno Partition of Properties a makuna, segun iti Seksion 2, Paglitegan 90 ti Napabaro a Paglintegan ti Korte (Revised Rules of Court). Sigurado nga ikeddeng ti kote a mabingay ti daga nga imbati ti nagawan nga amayo a kas ‘tay nakunakon, kagudua ti maited iti inayo ket dakayo nga uppat, pagbibingayanyo met ‘diay kagudua. Iti sabali a pannao, pagkapatenyo ‘diay kagudua ket ti tunggal maysa kadakayo, adda bingayna nga apagkapat.

Ngem ti kasayaatan nga aramidenyo, ta agiinakayo la ngarud, pagsasaritaanyo a nasayaat daytoy ta ti mapan iti korte a maaddaan iti kaso, adu ti magasto, adu a tiempo ken taktak ti mausar, ken mapataud ti guranggurayo nga agiina.

Aregluenyon; dikayon mapmapan idiay korte ta amangan no maibusto laeng ti sanikuayo.—O