Kasanon No Maikkat ti Pagyanan ti Apro? (2)
TULOY ti sungbat iti surat ni Ms. Shirley ti Nueva Vizcaya, 36 anios, ina ti tallo, ken empleado iti banko. Parikutna ti panagtakkina tunggal mangan iti taraon a nataba ta nadanum ken nadaruy ti takkina ket sa laeng lumaing no makatomar iti agas a kontra iti panagtakki. Kunana a naoperar ken naikkat ti pagyanan ti aprona (gallbladder), dua a tawenen ti napalabas. Kunana a saan a sigurado no normal ti mapaspasamak kenkuana ken atapenna nga adda madi a mapaspasamak iti bagina. Madanagan pay amangan no maipada iti angkelna a natay iti colon cancer.
Iti napalabas a bilang, inlawlawagtayo ti maipapan iti relasion wenno koneksion ti gallbladder ken ti panagtunaw.
Kinapudnona, no adda problemam iti pagyanan ti apro (gallbladder) a kas iti bato (gallstones), mabalin nga irekomendar ti doktormo a maoperarka tapno maikkat ti gallbladder-mo. Ti gallbladder ket maysa a lalaem nga agbiagka latta uray no awan. Ngem posible a mabayag sa maibagay (makapag-adjust) ti bagim iti kaawan daytoy.
Kaaduanna ti saan nga agproblema iti panagtunaw kalpasan a maikkat ti gallbladderda, ngem depende daytoy iti kabaelan ti bagim a makaadaptar. Mabalin a masapul laeng a baliwam dagiti taraon nga ipapaunegmo iti temporario wenno apagbiit a tiempo, wenno mabalin met a para iti agnanayon ti panangbaliwmo iti kankanem.
Mabalin a daytoy ti rason a nadaruy wenno nadanum ti takkim wenno kasla agtakkika. Diak met maawatan no apay a madanaganka a maaddaan iti colon cancer. Nupay kasta, posible a maaddaanka iti kanser gapu iti history ti pamiliam nga adda asideg a kabagiam (angkelmo) a naaddaan iti daytoy. Manen, masapul a makasaritam nga umuna ti doktormo. Wenno agpakitaka iti espesialista (gastroenterologist) tapno matsek-apka a nasayaat. Mairekomendar daytoy tapno natalged ti riknam nangruna no mapasingkedan a dimo pakadanagan ti colon cancer. Ania dagiti kanen kalpasan ti operasion iti gallbladder? Napateg no surotem a nasayaat ti balakad ti doktormo maipapan iti kanem kalpasan ti pannakaoperam iti gallbladder. No mayospital ti pasiente, kalpasan ti operasion, tumulong ti medical team tapno tulonganda daytoy nga ag-adjust manipud iti likido a mapan iti solido a dieta wenno makan. No met iti pagtaengan ti pagpalaingam, in-inut ti panangipaunegmo kadagiti makan ken ad-adda a ti kanem ket likido a makan, digo, ken gelatine.
No lumalaingkan iti panagriknam, in-inut a mangankan iti solido. Ngem adda dagiti makan a liklikam pay laeng bayat a mapadpadasam ti panagbubussog ken panagtakki. Kaaduanna ti agsubli iti normal a dieta (normal a taraon) makabulan kalpasan ti pannakaoperar.
Adda ketdi sumagmamano a makan a masapul a liklikan. Bayat ti panag-adjust ti bagim, nasayaat no liklikam dagiti nataba a makan iti sumagmamano a lawas kalpasan ti pannaikkat ti gallbladder-mo. Dagiti nangato ti tabana a makan: • Naprito a makan a kas iti French fries ken potato chips • Nangato ti tabana a karne a kas iti bacon, bologna, sausage, ground beef, ken ribs • Nangato ti tabana a dairy products, kas iti butter, cheese, ice cream, cream, whole milk, ken sour cream • Pizza • Makan nga adda butter-na. • Dagiti naraman ti kremana a digo wenno pagisawsawan • Meat gravies • Tsokolate • Manteka nangruna iti palm oil ken lana ti niog (coconut oil) • Kudil ti manok wenno pabo. (Adda tuloyna)