Dayawen ti Nakaparsuaan ken Agyaman iti Kinadaegna

ADTOY pay dagiti masapul a laglagipen ti asino man a mangibilang iti bagina a kas mangsalsaluad iti aglawlaw, wenno Apostol ti Nakaparsuaan:

• No saan a makaidna dagiti ayup, no rummuar dagiti uleg ken bao ken kapamiliada kadagiti abutda, no kalikaguman dagiti ikan ti makalibas, tumanagari dagiti manok ken kapamiliada, atapen ti yaay ti nakaro a didigra a kas iti ginggined. Agalibtak a mangsango kadagiti posible a bungana, ken mangipaay iti saranay.

• No adda mapaspasangasangan nga epidemia a kas iti bird flu, hepatitis, dengue, cholera, mangilungalong iti panagtitinnulong dagiti maseknan nga institusion tapno malapdan ti panagwaras dagitoy a sakit.

• No awan ti bibiang ti ubing iti nakaparsuaan, suruan daytoy, tarabayen a mangtakuat iti napintas a lubong ti nakaparsuaan (nature), ken ipaamiris kenkuana ti kinapatea ken ti akemna iti pannakamantener ti balansiado nga aglawlaw.

• No adda naimbag a tignay a mangsalbar iti aglawlaw, kas iti Clean and Green, wenno ania man a lokal a kampania, ibinglay ti suportam.

• No adda dagiti bangkag ken piskeria a nabaybay-an, ipamuspusan no kasano nga isubli ti kinaproduktibo dagitoy, wenno mapagbalin a sanktuario dagiti atap a nabiag.

• No naidalit gapu iti salun-at, takuaten dagiti natural a remedio iti panagusar iti erbal, babaen ti pet therapy, aromatherapy, ken dadduma pay a napaneknekanen ti kinaepektiboda a remedio, a supusopan met laeng ti panagpakita iti doktor.

• No atapen a ti sibilisasion ket dakes, a ramut ti gubat, kinakurapay, ken pannakadadael ti nakaparsuaan, ken kapadana, laglagipen a ti sibilisasion met laeng ti nangipamuspusan iti pannakabangon dagiti naisangsangayan nga institusion ti sangkatawan, ket ngarud, obligasion ti tunggal kameng ti gimong a manteneren ti integridad dagitoy nga institusion— pudno a naisangsangayan a mision nga idauluan.

• No daydayawen ti kinalawa dagiti baybay, patad, bambantay, ken panunoten nga awan pagpatinggaan ti rekursosda, kitaen dagitoy iti bassit a panirigan ta ti mapasamak iti basbassit a disso, isu met ti mapasamak iti nalawlawa a lugar— agbalin a propeta, saan a pakaisagmakan.

• No agballigika iti tay-ak ti akademia, sanikua, bileg, pamilia, kdp., ad-adda nga agbalin koma a karit ti panamagkaykaysa kadagitoy tapno maibinglay kadagiti agkasapulan ken para iti pannakataginayonda, ket daytoy ti agbalin nga ultimo a balligi.

• No ibukbok ti tiempo ken enerhia ken talento iti panagserbi iti komunidad ken aglawlaw a kas idikdiktar ti propesionmo ken kas naimbag a makipagili, dimo koma baybay-an ti obligasionmo iti bagim ken iti pamiliam, ket iti panangtungpalmo iti daytoy, mangbangon iti modelo a pangdaydayawan kenka dagiti pagserbiam.

• No aglumen ti namnama iti daytoy nagulo a lubong, ket agtultuloy ti pannakayalengaleng ti pannakasalaknib ni Ina a Daga, pannakaabuso dagiti tattao ken pannakabaybay-a ti panagkalikagum iti pudno a gin-awa, pannakatabbiraw ti linak ken panagkaykaysa iti gimong, pannakailupeklupek dagiti tagipatgen (values), agbalin koma a naalibtak a silaw, ti agbalin a napudno a para bantay (guardia), ta agur-uray ti oportunidad iti kas kenka.

• No iti maysa nga agsapa ti Domingo, mangngegmo ti uni dagiti billit kadagiti kayo, ti panagkanabsuor dagiti ikan iti dan-aw, no makitam ti panagsampaga dagiti sabong, mangitanamitim iti kararag ti panagdaydayaw ken panagyaman, babaen ti musika ken daniw, painting wenno iti simple a pampanunot iti kinadaeg ti nakaparsuaan.—O