TIPS

Tarabay iti Pagtaengan, Salun-at ken Dadduma Pay

AGYAMANKAMI manen ken ni ALMA JANE C. CALARAMO ti Brgy. Tamdagan, Vintar, Ilocos Norte kadagitoy impadigona a tips:

TI STEEL WOOL A KAS PAGASA KADAGITI KARTIB.

Saan a basta ibelbelleng dagiti diyon kayat a kitchen steel wool (daytay steel wool nga ususarenyo a pagug-ugas) ta mabalinyo nga usaren dagitoy a kas pagasa wenno pagpatadem kadagiti kartib. Ti aramiden, ikartikartib ti kartib iti steel wool. Babaen itoy, maasa met ti kartib. Punasan ti kartib kalpasanna iti naagneb nga espongha sa pamagaan babaen ti panangpunas iti lupot sakbay nga idulin.

WD-40 KONTRA ITI PIGKET.

No aksidente a napigketan dagiti ramaymo iti superglue (kas pagarigan adda pinigketam a project dagiti annakmo), pasuyotam dagiti napigketan a ramaymo iti WD-40 ket bay-an iti sumagmamano a minuto. No adda pay lang di maik-ikkat a pigket kalpasanna, pasuyotam pay sangkabassit. Ken agan-annadkanton no maminsan iti panagusarmo iti superglue.

TAPNO PRESKO DAGITI SABSABONG.

No kayatmo a presko dagiti sabsabong nga isangpetmo iti pangisagutam nga agnaed iti adayo a lugar, mangala iti lobo (balloon) sa kargaam iti 1/2 tasa a danum. Kalpasanna, iserrekmo ti puon ti ungkay dagiti sabong iti ngiwat ti balloon. Tapno malapdan met ti pannakaisina ti balloon, baredbedam iti lastiko ti ngiwatna. Iti sabali a pannao, ti lobo ti agbalin a pannakaplorera dagiti sabsabong bayat ti pannakaibiaheda.

TAPNO MAKAINUT ITI DANUM ITI FLUSH TOILET.

Uray kadaanan pay laeng ti flush toilet-yo, mabalin a makainutka pay laeng iti danum tunggal mai-flush daytoy. Ti aramidem, mangala iti 1-litro a plastik a botelia ti softdrink sa kargaam iti danum sa iserrekmo iti tangke. Ti espasio a sakupen ti botelia iti danum, isu ti kaadu ti danum a masalimetmetmo tunggal ag-flush-ka.