Agaramidtayo iti Tosino ken Noodles nga Ikan
KADAGITI napalpalabas a lawas, naadaltayo no kasano ti agaramid kadagiti naproseso a taraon manipud iti ikan, kas koma iti fish burger patties, fish nuggets, kdp.
Ita, padasentayo man met ti agaramid iti tosino manipud iti ikan, ken kas nayonna, iti noodles manipud iti ikan. Naisabsabali daytoy ta masansan a manipud iti arina ti maaramid a noodles.
Simple ti sistema a panangisagana kadagitoy ken alisto nga aramiden. Nayon pay laeng a padigo dagitoy kadatayo manipud kadagiti kakaduatayo iti College of Aquatic Sciences and Applied Technology (CASAT) iti MMSU, Currimao.
TOSINO NGA IKAN Dagiti Ramen:
5 kg nga ikan 3 tasa a soy sauce 1 kutsara a pimienta, nadekdek 3 kangipen a bawang, nadekdek
3 tasa a nalabaga nga asukar
Panangisagana
1. Iw-iwaen dagiti ikan iti wagas a makunkuna a filleting iti kaatiddog a 4”.
2. Mangala iti dakkel a malukong. Paglalaoken ti bawang, asukar, soy sauce, ken pimienta.
3. Inayon dagiti napaglalaok a ramen iti ikan. Kiwaren a nasayaat.
4. Yuper ti ikan ti uneg ti 6 oras. Paangsetan kalpasanna.
5. Ikabil iti ziplock. Idulin iti refrigerator tapno agbayag.
* * *
NOODLES NGA IKAN Dagiti Ramen
1 tasa nga ikan, natadtad iti napino
3 tasa nga arina 1 tasa a bellaay (galapong) 1 itlog 1-½ kutsarita a lye
Panangisagana
1. Paglalaoken ti arina ken ikan. Inayon ti lye, asin ken nalabaga ti itlog.
2. Pagtitiponen a nalaing dagi ramen.
3. Iwaen ti mixture iti apagkapat, masaen a nasayaat ket ipadalan iti pagaramidan iti miki.
4. Ikelnat dagiti naaramid a noodles iti maysa a minuto wenno agingga nga agtapaw.
5. Bugguan dagiti noodles iti nalamiis a danum. Paubosan a nasayaat. 6. Prituen dagiti noodles.
* * * No kayatyo met ti masanay iti panagproseso iti taraon, mabalinyo ti agsurat iti Presidente ti MMSU (Dr. Shirley C. Agrupis) through the Office of the Vice President for Research, Extension, and Business (Dr. Epifania O. Agustin). Adda dagiti ekspertotayo manipud iti MMSU College of Aquatic Sciences and Applied Applied Technology (CASAT) a kas koma kada Ms. Glezzenda P. Balbuena ken Ms. Carmencita A. Saladino a mangsanay kadakayo.—O