Amirisenyo dagiti buybuyaenyo, kuna ti MTRCB kadagiti agtutubo nga Ilokano

Agbalinkayo koma a managamiris kadagiti buybuyaenyo a pelikula ken pabuya iti telebision.

Daytoy ti kiniddaw ti Movie and Television Review and Classification Board (MTRCB) iti naangay a forum maipanggep iti “responsible viewership” a napauluan iti “Para sa Matalino at Responsableng Panonood ng Pamilyang Pilipino.”

Naangay ti forum iti Provincial Capitol Auditorium ken Northwestern University (NWU) iti Siudad ti Laoag idi Mayo 11-12, 2018 iti pannakitinnulong ti Gobierno Probinsial ti Ilocos Norte (PGIN). Nagsarita iti nasao a taripnong da MTRCB Board Members Paolo Santos, Pablo “Bogie” Reyes, Atty. Marites Candido, ken dati a chairperson Marisa Laguardia a dinar-ayan ti ag-300 a partisipante manipud kadagiti unibersidad ken gunglo dagiti agtutubo iti probinsia a pakairamanan ti Sirib Ilokano Kabataan Association (SIKA).

Iti nasao a forum, inggunamgunam ni MTRCB Board Member Paolo Santos a saan laeng koma nga agbuybuya dagiti agtutubo kadagiti pabuya iti telebision no di ket amirisenda met no nasayaat met laeng dagiti mabuybuyada.

Kinuna met ni Radz B. Bismonte, Media Incentives Desk (MID) officer ti Provincial Communications and Media Office (CMO), nga itoy a panawen, a nagdakkelan ti impluensia ti pelikula ken telebision, nasken ti kampania maipanggep iti pannakaitandudo ti “responsible viewing” wenno panagbalin dagiti Ilokano a managamiris no maikanatad met laeng wenno saan dagiti buybuyaenda. (JAGudoy)