Saan nga Umibbet ni Bea iti Relasionda ken Gerald?
ADDA pay laeng relasion da Gerald Anderson ken Bea Alonzo. Dayta ti konklusion ti kaaduan, ‘bagis. Maibatay dayta kadagiti sungbat ni Bea iti interbiu kenkuana ni Boy Abunda.
* * * Nalawag pay nga adda ketdi parikut a risrisuten ita da Bea ken Gerald.
Nalawag pay a no mabalin, saan a kayat ni Bea a masayang ti relasionda ken Gerald. Go, Bea. Kapit lang, a kuna dagiti Tagalog.
* * * Kuna ni Jaclyn Jose a saan a pudno ti damag nga inawisna ni Andi Eigenmann nga agtrabaho iti GMA-7.
Ti kano kuna ni Jaclyn, inawisna nga agtrabaho iti GMA-7— no awan ti sabali a trabahona. Wenno, no awan ti trabahona iti ABSCBN.
Sabagay.
* * * Saan— pay laeng— a masunotan ti pelikula da Coco Martin ken Vice Ganda, ‘bagis.
Ti ketdi nalawag, adda pagkaduaan a pelikula da Coco ken Vic Sotto a manamnama nga entry iti Metro Manila Film Festival 2018.
Hm. Manipud ken ni Vice, napan ken ni Vic ni Coco, a.
* * * Makapaliday laeng ti situasion da Janella Salvador ken ti inana a ni Jenine Desiderio.
Gapu iti pinnauyoda, saan a kinablaawan ni Janella ti inana iti napalabas a Mother’s Day.
Adu ti masaknaran nga am-ammo ni Janella a saan a nasayaat daytoy a situasionda nga agina.
Ta no adda dimo kasasao a kameng ti pamiliam, nadagsen ti riknam ken naatap met ti gin-awa.
Nakarkaro pay daytoy kasasaad ni Janella ta inana mismo ti dina kasasao.
Ala, sapay koma ta agkappianto met la dagiti agina.—O