‘Pabebe’ ti Akting ni Arci
SINALAKNIBAN ni Arci Muñoz iti social media ti karakterna iti “Since I Found You (SIFY).” Dinillaw ngamin ti sumagmamano a netizens a naarte ken ‘pabebe’ ti aktingna iti nasao a teleserye.
Kuna met ni Arci a kasdiay a talaga ti kababalin ti akemna kas Daniella “Dani” Cobarrubias, a maysa nga estudiante iti kolehio ken intern iti kompania ni Nathaniel “Nathan” Capistrano nga inakem met ni Piolo Pascual.
Adda ketdi dagiti natanang a netizens a nangibaga ken ni Arci a nasayaat met no denggen daytoy ti makuna dagiti agbuybuya. Maysa kadagitoy ti nangibaga a nagustuanna met ti akting ti balasang kadagiti dua a pelikulana, ti “Always Be My Maybe” ken “Can We Still Be Friends.”
Ngem nupay kuna ni Arci a kasdiay a talaga nga akting ti dawdawaten ti papelna, ar-aramidenna met daytoy para iti pannakaliwliwa dagiti fans.—O