Kalbit

(ken ni DLN)

Bannawag - - Itoy A Bilang - Arnold Pascual Jose

bay-am nga agpukaw da solitario ken soledad iti agnanayon a panaguray. pasetdanto latta ti erres ti duduogan a biag. kas kenka, kaduatay’ ida itoy nagkukuyogantayo a dallang: namunganay iti palasion’ mistro atong a kain-innisem ti pungtil a torret’ bacarra; sa ti nakallalagip a dayangdayang idiay estasion ti dwfb; kasta metten ti palayupoy idiay ganio hill; ken ti linak ti aplaya ti kadilian idiay davila. sa nagumok iti kalye gen. ordones idiay marikina heights. ay, bay-am nga umisem ita ni apo lung-aw a kinadkadua ken nangpastor.

wen, adda amin kaikarian, iti ragsak man wenno liday. iti appupo ti sipnget wenno iti tumpuar a sinamar iti langeb. pabasolen ti basol a namunganay iti hardin ti eden. adda ketdi sam-it ti panagbasol a kayaw dagiti vitiligo. uray idi panawen ni ari david, adun dagitoy, a kas met la iti ari. ngem nakapudnoda ketdi iti bilin ti Namarsua: inkay’ agpaadu.

bay-am ngarud ida a mangnanam saem-pannakaila a di agpatingga ken nagsinsinanda a liday. ngem kinunak idin, mabalasanto lattat’ madi a gasat. malagipmo idi agkosinerotayo iti naminsan a kasangay ni manong dionisio? nasapa a nagiddatayo idi bisperasna. ngem malas! nagdidiskoda ketdin iti rooftop a ngatuen laeng ti #402 a kondominiumtayo. anian a rurod, lunod, tabbaaw, ken sanaltek, nangnangruna ken ni bebs. ditay’ man nairidep. idi pasado alas tres, nagbibinnatondan iti botelia. idi agkalma, impukkaw ti lakay a masemsem met ken maseknan iti baba: “gentlemen, kindly pey ol da deposit ob ebri batel you trow! tenk you en good morning!” inyinglesna. nagpapaggaaktayo!

wen, ti lubong ket lubong. saan a paraiso. naariwawa, mananggundaway, kalawakaw, mangyaw-awan, managbasol. ngem iti Apo, agngudo kinaagnanayon ti agnanayon.

Newspapers in Tagalog

Newspapers from Philippines

© PressReader. All rights reserved.