Naan-anay a Talna

Basaentayo ti 1 Tesalonica 5:16-18

Bannawag - - Siled Ti Kararag - Ni GINNY NEIL ti Virginia

Siak laeng ti makaammo kadagiti planok a maipaay kadakayo, planok a mangparang-ay a saan ketdi a mangdidigra, plano a mangibanag iti namnamayo iti masakbayan.—Jeremias 29:11

APAGSANGPETKO, intupakko ti bagko iti sopa. Impakaammo itay ti superbisorko a mabalin a maikkat ti posisionko iti trabahok. Pagsasaritaan kano pay ti School Board inton umay a lawas no ania ti aramidenda iti programa a para kadagiti nalalaing nga ubbing nga indauluak iti walo a tawen. Inaramidko ti amin a kabaelak a mangipalawag iti kinapateg ti programa, ngem bassit ti badiet ken adu ti masapul a paggastuan. Mabalin nga awanton ti trabahok inton umay a tawen.

Diak makaturog iti dayta a rabii. Nalagipko ti maysa a debosion a nabasak sumagmamano a tawenen ti napalabas— italekmo ti amin iti pagayatan ti Dios. Kabaelak ngata nga aramiden daytoy? Nakasaganaak kadi a mangitalek iti masakbayak iti Dios? Pinampanunotko daytoy kadagiti sumaruno nga aldaw bayat ti panagmiting ti School Board. Kasla awanen ti namnamak iti rabii ti Biernes, ngem inkararagko: “Maaramid koma ti pagayatam, Apo. Awatek ania man ti planom iti masakbayak.” Diak ninamnama ngem limmag-an ti riknak ket nagtalna ti panunotko.

Iti sumaruno a Lunes, naammuak nga agtultuloy ti programak ken limmawa pay ti sakupna. Naragsakanak. Kangrunaanna, nasursurok nga ania man ti mapasamak, masarakak ti talna no agsadagak iti Dios.

Kararag: Amami a nailangitan, tulongannakam’ a mangsurot iti Anakmo no agdanagkami iti masakbayan— tapno masarakanmi ti talna, ikararagmi, “Saan a ti pagayatak ti maaramid, no di ket ti pagayatam” (Lucas 22:420). Amen. Kapanunotan: No isukok ti biagko ti Dios, maadda kaniak ti talna. Ikararagan: Dagiti mannursuro.

Newspapers in Tagalog

Newspapers from Philippines

© PressReader. All rights reserved.