Naimasetera a Tsiko, Kayatmo?

Wenno mangga, sua, bayawas, makopa?

Bannawag - - Ti Tarakenmo Ken Sika - Ni ZAC B. SARIAN

ITAY laeng nabiit, iti Agribiz Kapihan iti Harbest Events Center iti Taytay, Rizal, impakitami babaen ti Power Point dagiti nadumaduma a kayo nga agbungbunga a naimula iti container. Kalpasan ti presentasionmi, nakaad-adu dagiti naginteres nga agmula met iti bukodda a kayo nga agbunga iti container. Ngem nagkiddawda iti nayon nga impormasion no kasano nga agballigida iti daytoy a gannuat. Kinapudnona, nakaad-adu dagiti kayo nga agbunga a mabalin nga imula iti container. Kas koma kadagiti sumaganad: Mangga

Dakkel a kayo ti pagbalinan ti mangga. Ngem mabalin met nga imula daytoy iti container. Kinapudnona, addan dagiti immulami iti container a napagbungami a kas iti Millenium mango, Eating Green a naggapu iti Thailand ken uray pay ti bukodtayo a carabao mango. Idiay Davao itay nabiit, nangabak iti salip iti Kadayawan Festival ti Nam dok mai a mangga a

naimula iti container a kukua ni Lorena Tatoy.

Sua

Napintas pay nga imula iti container ti sua. Dagitoy ti barayti nga immulamin iti container— ken napagbungami: Magallanes, Viernam White, Vietnam Red, Sweet Siam, kdp. Adda dagiti barayti sua a naalsem ken di naimas ti ramanna. Isu a pilienyo dagitay naimas a barayti.

Tsiko

Dakkel met a kayo ti pagbalinan ti tsiko. Ngem mabalin met nga imula iti container ken mapagtalinaed a nababa babaen ti ‘pruning.’ Mairaman kadagiti paboritomi nga imula iti container ti Variegated, Mapino, Pineras, Yusepeng, kdp.

Bayawas

Napintas met nga imula iti container ti bayawas. Paboritomi ‘tay seedless wenno awan bukelna. Pagaayatmi pay ‘tay Vietnam pink, Señorita (babassit ti bungana), Keso de Bola, Orange (naggapu iti Taiwan), kdp.

Makopa

Nalaka a pagbungaen dagiti imported a makopa uray maimula iti container. Mairaman kadagitoy ti Mini makopa, Green Makopa, Apple Makopa ken dadduma pay a barayti. ‘Tay namarkot a makopa a maimula, mabalin nga agbungan makatawen kalpasan a maimula iti container.

Sitrus

Maibagay met iti container dagiti sitrus a kas iti kalamansi, lemon, dalandan, variegated orange, lemon, dalayap, kdp. Uray bugnay, mabalin met.

Panangtaripato

Umuna, nasken a maimula ti kayo iti napintas a potting media. Mabalin a napaglaok a garden soil (40%), organiko a ganagan (Durabloom ti paboritomi) 30 a porsiento, 30 a porsiento nga uring ti taep. No awan daytoy, mabalin lattan ‘tay taep.

Nasken met nga ipuesto ti mula iti main-initan. Gapu ta agkurang ti pangalaanna iti sustansia, nasken a masansan a maganaganan iti kemikal ken organiko nga abono. Kas koma binulan.

Saan met a liplipatan a sibugan gapu ta nalaka nga agmaga ti daga iti container. Nasayaat met no maispreyan iti foliar fertilizer tunggal sangapulo nga aldaw. Adu ti magatang a foliar fertilizer kadagiti agricultural supply.

Nasken met ti panagkissay iti di nasken a sanga (pruning) kas koma kadagiti babassit a sanga iti sirok ken iti uneg a paset ti kayo. No diyo kayat a dumakkel ti kayo, putdenyo ti pamayorna.

Panagpaadu

Mairekrekomendar a dagiti grafted ti maimula iti container tapno daras agbunga. Ngem ti paboritomi a pagpaadu iti imula iti container, isu ti panagmarkot. Dakkel a dagus no kua ti imula ket ngarud, al-alisto met laeng nga agbunga.

Padasenyo man met ti agmula iti kayo nga agbunga iti container. Masiguradok a maayatankayto.—O

Variegated chico.

Sweet dalandan.

Seedless guava.

Nasken nga isupot dagiti bunga ti daligan (balimbing), kas iti ar-aramiden ni Wendell Sarian kadagitoy bunga dagitoy a daligan tapno di kapten ti fruitfly.

Green makopa.

Sua.

Newspapers in Tagalog

Newspapers from Philippines

© PressReader. All rights reserved.