Ta Ipatpategda ti Kinailokanoda

Pammadayaw ti Provincial Information and Tourism Office ti La Union dagiti ladawan a naaramat iti salaysay.

Bannawag - - Itoy A Bilang - Djuna R. Alcantara

MAIKADUA itan a tawen nga impaayan ti Probinsia ti La Union iti naisangsangayan a kaimudingan ti kultura ken pagsasaotayo nga Ilokano iti “Buwan ng Wika” a maramrambakan iti Agosto iti kada tawen babaen ti Piesta ni Ayat (Ayat Festival) a nairubuat idi 2011, kas pakpakauna ti dandani idin maipasngay nga Iloko Code of La Union.

Ti Konseho ti Kultura ken Lengguahe ti La Union ti napusgan a mangiwayat iti nasao a piesta a pakaitampokan dagiti salip a bin-ig nga adda kaipapananna iti kabibiagtayo nga Ilokano ken pakitinnulongan dagiti nadumaduma a sektor ti kagimongan babaen ti panangidaulo ni Gob. Francisco Emmanuel “Pacoy” Ortega III.

Maibilang kadagiti kangrunaan a kameng ti konseho ti Commission on Higher Education (CHED) ken ti Department of Education (DepEd). Maysa met kadagiti dakkel ti akemna iti pannakaangay ti tinawen nga Ayat Festival ni Adamor L. Dagang, ti Provincial Information and Tourism Officer, kas Executive Officer ti konseho.

Naluktan dagiti salip kadagiti agad-adal iti elementaria ken

hayskul kadagiti 19 nga ili a pakairamanan ti Siudad ti San Fernando. Adda Street Dancing, La Union Henio Bersion 2.0 (Iloko Quiz Bee), Torneo iti Iskrabiloko, Salip iti Deklamasion, Ilokano Chorale, ken Iloko Essay Writing Contest.

Narugian ti Ayat Festival 2018 idi Agosto 13 iti covered court ti poblasion ti Bacnotan babaen ti salip iti Street Dancing a nagkampeonan ti bunggoy ti ili ti Sto. Tomas. Makaengkanto ti impamatmatda a laing a nangiladawan (babaen ti sala) iti industria ti daing iti Brgy. Damortis. Ditoy a masarakan iti agsumbangir nga igid ti kalsada nasional dagiti agarup agdidippit a puesto dagiti agkakaimas a klase ti daing nga ikan.

Kalpasan ti salip iti street dancing, naisaruno ti baro a bersion ti La Union Henio (ay-ayam iti lengguahe nga Ilokano). Naikkan dagiti nakisalip kadagiti masungbatan a saludsod a kaaduanna ti mabirokan ti umno a sungbatda kadagiti pagiwarnak ti Gobierno Probinsial ti La Union (PGLU). Kas pagarigan, ti Baggak Festival ti ili ti Bauang, ti Basi Festival ti Naguilian, ti Dinengdeng Festival ti Agoo, ti Tangadan Falls ti San Gabriel, ti abel a kangrunaan a produkto ti Bangar ken dagiti namaris a bisil iti aplaya ti Luna nga iti pammati dagiti nataengan sadiay ket “regalo manipud iti langit.”

Iti nasao a salip, nagkampeon ti Ambalite Elementary School ti ili ti Pugo (benneg ti elementaria). Iti hayskul, nagkampeon met ti Bacnotan National High School.

Dua ti naggiddan a naangay a salip iti Agosto 23. Ti Torneo ti Iskrabiloko ken ti Salip iti Deklamasion. Naangay ti Iskrabiloko (ayayam maipapan iti lengguahe ni Ilokano) a para iti dua a kategoria (para nataengan ken para kadagiti agad-adal iti hayskul) iti Ortega gymnasium iti igid ti Baybay ti Siudad ti San Fernando.

Para iti hayskul, nagkampeon ni Mae Nadine Lagasca ti Aringay Central School; ni met Georgia Shane F. Valmonte ti ili ti Bacnotan ti nangabak iti ay-ayam dagiti nataengan.

Sto Tomas, La Union: kampeon iti L.U. Ilokano Street Dancing.

Umuna a Gunggona, L.U. Henio Ber. 2 (Iloko Quiz Bee), Elementaria: Inawat ti bunggoy ti Pugo Elementary School ti premioda a P10,000.00 ken medalia manipud iti Gobierno a Probinsial ti La Union (PGLU) nga imbagian da SPM Nancy Bacurnay (kakanigidan), pangulo ti komite ti edukasion ken kultura ti Sangguniang Panlalawigan, OPG Exec. Sec. Joy Ortega (maikadua iti kanawan) ken LU PITO Adamor Dagang.

Ni Mae Nadine Lagasca (maikatlo iti kanigid), Aringay ken dagiti kakaduana a nagkampeon iti Torneo iti Iskrabiloko 2018, kategoria iti hayskul.

Inyalat ni Favienne Angelie D. Sudario (maikatlo iti kanawan) ti Sudipen ti kampeonato iti Salip iti Deklamasion (hayskul).

Umuna a Gunggona, La Union Henio Ber. 2 (Iloko Quiz Bee), Hayskul: Inawat ti bunggoy ti ili a Bacnotan nga indauluan ni Ms. Divina Fontanilla (maika-3 iti kanawan) ti premio a P10,000.00 ken medalia manipud iti Gobierno Probinsial ti La Union (PGLU).

Ni Mikaella Maglaya ti Agoo (maikadua iti kanigid), kampeon iti Essay Writing Contest (hayskul).

Dagiti hurado ti L.U Henio Bersion 2: Agpakanawan: ti autor, pangulo ti hunta; Cesar Bucsit ti DepEd Region I, ken Mila Abuan ti KBP La Union. Kaduada iti ladawan ni PITO Adamor Dagang.

Newspapers in Tagalog

Newspapers from Philippines

© PressReader. All rights reserved.