Ti Gasatmo Ita a Lawas

Bannawag - - Itoy A Bilang -

VIRGO (Agosto 21- Septiembre 22). Dagiti positibo ti panagpampanunotda a tattao ti rason ti manamnama a pannakaawatmo iti parabur. Manamnama pay ti agtultuloy a yaay ti grasia no agbalinka nga instrumento ti pannakaipaay met ti grasia iti sabali. Nagasat a numero: 2, 4, 9.

LIBRA (Septiembre 23- Oktubre 22). Kasapulam ti paratignay tapno agsubli ti arisgarmo iti trabahom. No awan latta ti ganasmo, tiempo ti yaakar iti sabali a pagtrabahuan. Sirigem man ketdi dagiti pagirayam amangan no trabaho a paglinglingayan payen ti umisu kenka. Nagasat a numero: 1, 5, 8.

SCORPIO (Oktubre 23- Nobiembre 22). Awan ti pakadanagan no agtalekka ken agsadagka iti kinapudno. Laglagipen ketdi nga adda pagpatinggaan ti panagpabus-oy ta masapul met nga ikkam iti respeto ti bukodmo a bagi. Nagasat a numero: 3, 4, 7.

SAGITTARIUS (Nobiembre 23- Disiembre 20). Bigbigen nga addaanka iti naisalsalumina a talugading ket saan a masapul a yatar ti bagim ta adda kadagitoy ti pagbanagam: apalam ti sabali wenno tagibassitem ti sabali. Mangitudoka iti bukodmo a bituen; mangusatka iti bukodmo a dana; mangisuratka iti kabukbukodan a pakasaritaan. Nagasat a numero: 2, 6, 9.

CAPRICORN (Disiembre 21- Enero 19). Ti napagus a panagkalikagummo a matun-oyan dagiti arapaapmo ti mangsursuro kenka kadagiti wagas a pakalag-anam. Agannad laeng iti mabalin a pannakayagus ti riknam ket agtinnag a darasudoska. Nagasat a numero: 1, 5, 7.

AQUARIUS (Enero 20- Pebrero 19). Pagimbaganna, nakasaganaka ket saanka unay nga agkarangkang iti pettat a yaay dagiti paggastuan. Maiturong pay ti imatang iti ad-adda a pangyintekan iti imatang: ti salunat dagiti kameng ti pamilia. Nagasat a numero: 3, 4, 8.

PISCES (Pebrero 20- Marso 20). Maikagumaanan a maagasan dagiti sagubanitmo a mangipapaay kenka iti nababa a panagkita wenno panagtalek iti bagi. Ad-adda ketdi nga ibilangmo a parabur ti pannakaamiris a nasaysayaat a bigbigen ti pagkapsutan, ta awan met ti perpekto a tao. Nagasat a numero: 2, 6, 9.

ARIES (Marso 21- Abril 20). Denggen dagiti kalikagum ti pisikal a bagi. No ibaga daytoy a masapulna ti inana, ipaayan koma iti umdas nga inana. Gundawayan ti ammom iti teknolohia tapno makainutka iti pirak ken enerhia. Nagasat a numero: 1, 4, 7.

TAURUS (Abril 21- Mayo 20). Nasayaat a tiempo para iti puso, ken para iti negosio. Mabalin a yasidegnaka ni patpatgen iti maysa a pagayam a makatinnulongmo iti pagganaran a para iti mabayag a tiempo nupay saan a kas kadakkelna ti mapadekket, adu met a pagimbagan ti ipaayna para iti kaaduan. Nagasat a numero: 3, 5, 8.

GEMINI (Mayo 21- Hunio 20). Adda dagiti pagilasinan a makatulong kenka tapno mayetnagmo ti maysa a pangngeddeng a dakkel ti epektona iti personal a biagmo ken iti trabahom. Nalag-an ti rikna ket nalaklakam met a marisut dagiti parikut a nabaybay-an pay ketdin iti selselsel. Nagasat a numero: 2, 4, 9.

CANCER (Hunio 21- Hulio 20). Makailatang iti umdas a tiempo a para kadagiti patpatgen a mangipaay met iti gundaway tapno makaparnuay pay iti ad-adu a pannakipagayam. Adda met dagiti lumtuad nga idea a pagganaran. Nagasat a numero: 3, 6, 7.

LEO (Hulio 21- Agosto 20). Mabaelan ti rumuk-at manipud iti kahon ti kinanegatibo a gapuanan ti sabali a tao. Maysa a pagayam ti makatulong kenka iti daytoy nga iruruk-at kasta metten iti yaaddangmo nga agturong iti kinapositibo. Nagasat a numero: 2, 5, 8.

Newspapers in Tagalog

Newspapers from Philippines

© PressReader. All rights reserved.